19-anyos stude nag-amok: 2 pinagsasaksak
MANILA, Philippines — Isang 19-anyos na estudyante ang dinakip matapos na mag-amok at pagsasaksakin ang dalawang nakaalitan nito sa Novaliches, Quezon City nitong Linggo ng madaling araw.
Nasa kustodiya na ng pulisya ang suspek na si Jay-mark Caliguiran, binata, at nakatira sa No. 28 Nenita Interior, RP Brgy. Gulod, Novaliches, QC.
Ginagamot naman sa Novaliches District Hospital ang sugatang si Voborge Cabrera Magpayo, 21, may live-in partner, at nakatira sa Lower Baluyot, Brgy. Sauyo, Novaliches habang sa Chinese General Hospital isinugod si Eugene Navarro, 23, may live-in partner, service crew, ng No. 5 Old Paliguan, Brgy. Bagbag, Novaliches, Quezon City.
Sa report ng Novaliches Police Station 4 ng Quezon City Police District (QCPD), bandang ala-1:30 ng madaling araw, nang maganap ang insidente sa Seminary Road kanto ng Quirino Highway, Brgy. Bagbag, Novaliches.
Sa imbestigasyon ni PStaff Sgt Germito Loria Jr., nagkaroon ng mainitang pagtatalo sa pagitan ng mga biktima at suspek sa ‘di malamang dahilan.
Sa gitna ng pagtatalo, dito na nagwala ang suspek at biglang bumunot ng kutsilyo saka inundayan ng sunud-sunod na saksak ang mga biktima.
Tatakas pa sana ang suspek pero agad siyang naaresto nina PCpl. Aldwin Nofies at Pat Nikko Prila na mabilis na nagresponde sa lugar. Nakumpiska sa suspek ang kutsilyong ginamit sa pananaksak.
- Latest
