Eala may first-round bye sa Asiad

MANILA, Philippines — Makasisiguro si Alex Eala ng opening round bye sa women’s singles tennis competitions ng Asian Games na gaganapin sa Nagoya City Higashiyama Park Tennis Center sa Japan.

Base sa inilabas na draw ng mga organizers, hahawakan ni Eala ang top seeding upang awtomatiko itong makapasok sa second round ng torneo.

Ibinigay naman ang No. 2 seed kay Zhang Shuai ng China na kasalukuyang No. 55 sa WTA rankings habang No. 3 seed si Yulia Putintseva ng Kazakhstan at No. 4 si Wang Xiyu ng China.

Nagtagpo na sina Eala at Zhang sa WTA Tour.

Tinalo ng Pinay netter si Zhang sa opening round ng HSBC Championships sa London, England noong Hunyo sa iskor na 6-3, 6-2.

Sa second round ng Asian Games, hihintayin ni Eala ang mananalo sa pagitan nina Patcharin Cheapchandej ng Thailand at Mahin Aftab Qureshi ng Pakistan sa first round.

Nais ni Eala na ma­karesbak sa Asian Games matapos maagang masibak sa Singapore Open.

Lumasap si Eala ng 6-4, 5-7, 3-6 kabiguan sa kamay ni unseeded player Tatiana Prozorova ng Russia sa second round noong Huwebes.

Sasabak din sa wo­men’s singles si Tenniele Madis.

Sisimulan naman ni Madis ang kampanya nito sa pagsagupa kay No. 7 seed Himeno Sakatsume ng Japan sa opening round.

Magtatambal naman sina Eala at Shaira Hope Rivera sa women’s doubles kung saan makakalaban nila sina Hong Kong bets Lai Ching Laam at Kallista Liu sa opening round.

Magkasama naman sina Rivera at Francis Casey Alcantara sa mixed doubles kung saan sasagupain ng dalawa sina Kasra Rahmani at Meshkatolzahra Safi ng Iran.

Sina Eala at Alcantara ay dating magkapares sa mixed doubles event.