Lancers padayong nanginit, gilampornas ang Wildcats

CEBU, Philippines — Si Winston Bingil maoy nasentro sa atensiyon sa dihang ang reigning four-peat champions University of the Visayas (UV) Green Lancers miinat sa mainit nilang ratsada ngadto sa unom ka duwa uban ang 85-63 nga paglampaso nsa Cebu Institute of Technology-University (CIT-U) Wildcats sa Cebu Schools Athletic Foundation, Inc. (CESAFI) Season 26 basketball tournament niadtong Domingo sa gabii, Oktubre 4, sa Cebu Coliseum.

Ang nagmangtas nga si Bingil mipaulbo og 38 puntos humannakapasud og 15 sa 23 niya ka itsa apil na ang lima ka 3-pointers. Aduna sab siyay lima ka rebounds ug usa ka steal sa dihang giangkon sa Lancers ang solo nga liderato sa college division bitbit ang 6-1 win-loss rekord.

Si Ivan Clark Alsola midugang og 11 puntos, siyam ka rebounds ug duha ka steals alang sa Lancers, nga wala na molingi pa sukad sila misutoy ngadto sa sayong 26-13 nga labaw.

Ang mga batos ni coach Gary Cortes misira sa first half uban ang 49-31 nga bentaha, nga ila pang gipaburot ngadto sa 28 puntos sa ikatulong kuwarter.

Ang Lancers nakasustinir sa eksplosibo nilang opensiba sa nahibiling bahin sa duwa dayon na ngadto sa pagkulit og impresibong 22 puntos nga kadaogan.

Si Wayne Victor Gementiza mihipos og 11 puntos ug upat ka rebounds, samtang si Jerian Marc Abello mitali og 10 puntos alang sa Wildcats, nga natagak sa 4-4.