2 Vietnamese na mga pekeng doktor, tiklo sa CIDG

MANILA, Philippines — Dinakma ng mga tauhan ng Criminal Investigation and Detection Group (CIDG) ang dalawang Vietnamese na nagpapanggap na mga doktor matapos na mahuli sa aktong nagsasagawa ng medical examinations sa isang hotel sa Parañaque City.
Kinilala ang mga suspek na sina “Thao Anh”, 31, babae, at “Dong Xuan”, 29, lalaki. Huli sa akto ang dalawa na nag-iinject ng substances, nagbibigay ng gamot, at nagsasagawa ng whitening treatment nang walang awtorisasyon mula sa Professional Regulation Commission at Philippine Medical Association.
Nabatid na nakatanggap ng reklamo ang CIDG hinggil sa modus ng mga suspek kaya agad na ikinasa ang entrapment operation.
Nasamsam sa operasyon ang iba’t ibang vials ng kemikal, mga kahon ng syringe, samu’t saring tablet at capsule, at iba pang kagamitan na tinatayang nagkakahalaga sa P150,000.
Nahaharap sa reklamong paglabag sa Republic Act No. 4224 o The Medical Act of 1959 ang dalawang suspek.
- Latest


















