Chef timbog sa P1.5 milyong kush, marijuana oil
MANILA, Philippines — Arestado ang isang nagpakilalang chef sa ikinasang operasyon ng Makati City Police na nagresulta sa pagkakatimbog ng higit sa P1.5 milyong halaga ng marijuana o kush at marijuana oil, kamakalawa ng umaga sa naturang lungsod.
Itinago muna ng pulisya ang pagkakakilanlan sa suspek sa alyas “R”, 33, upang hindi maapektuhan ang ikinakasa pang imbestigasyon at follow-up operation.
Sa inisyal na ulat ng Makati Police, unang dumulog sa kanila ang impormante na si alyas “Nico”, empleyado ng isang delivery service. Isinumbong niya ang modus ng operasyon ng suspek na ginagamit ang kanilang serbisyo sa delivery ng iligal na droga.
Dito nagkasa ang mga tauhan ng Station Drug Enforcement Unit at Substation 7 ng joint operation na nagresulta sa pagkakadakip sa suspek dakong alas-8:20 ng Biyernes ng umaga sa loob ng delivery express company sa may Brgy. Guadalupe.
Nakumpiska ng mga pulis ang mga marijuana na nakasilid sa apat na malalaking plastic bag at 20 plastic sachet na naglalaman ng marijuana juice. May kabuuang halaga ang iligal na droga na P1,540,000.00.
- Latest