Electrician, huli sa 1 kilo ng shabu
MANILA, Philippines — Arestado ang isang electrician matapos na mahulihan ng isang kilo ng shabu na nagkakahalaga ng P6.8 milyon sa isang operasyon sa Cubao, Quezon City kamakalawa.
Batay sa ulat ng Philippine Drug Enforcement Agency (PDEA), nakilala ang suspek na si Jayson Legaspi, at residente ng naturang lungsod.
Nabatid na dakong alas-11:00 ng gabi kamakalawa nang maaresto ang suspek sa isang buy-bust operation sa EDSA, Brgy. E. Rodriguez, Cubao, Quezon City.
Nauna rito, nakatanggap ng tip ang PDEA hinggil sa ilegal na aktibidad ng suspek, na batay sa kanilang intel report ay may limang ulit na umanong nag-deliber ng ilegal na droga, kaya’t kaagad na nagkasa ng operasyon, na nagresulta sa pagkakadakip ng mga ito.
Ayon sa PDEA, bago naaresto ay may isang linggo umano nilang minanmanan ang suspek na sinasabing miyembro ng isang sindikato na nagbabagsak ng malakihang halaga ng illegal na droga sa Cubao.
Depensa naman ng suspek, nangangalakal lamang siya noon nang may lumapit na lalaki sa kanya at hinikayat siyang ideliber ang isang paper bag kapalit ng pera.
Dahil kailangan umano niya ng pera ay pumayag siya ngunit hindi umano niya batid na shabu pala ang laman ng naturang paper bag.
- Latest