Libreng WiFi sa Maynila
MANILA, Philippines — Isa-isa nang natutupad ang mga programa ni Manila Mayor Isko Moreno matapos na magkapirmahan sila ni Philippine Long Distance Telephone Company (PLDT) at Smart Communication, Inc. Chairman at Chief Executive Officer (CEO) Manny V. Pangilinan kahapon ng memorandum of agreement (MOA) para sa paglalagay ng Smart WiFi sa lungsod.
Sa isang simpleng seremonya, sinabi ni Pangili-nan na ang free Smart WiFi ay ilalagay sa Ospital ng Maynila, Tondo Medical Center, Gat Andres Bonifacio Memorial Medical Center, Unibersidad de Manila at Museo Pambata.
Sinabi ni Pangilinan na layon ng free WiFi, na mabigyan ng mabilis na access sa komunikasyon ang lungsod gayundin ang mismong tanggapan ng city hall, ospital at unibersidad.
Ayon kay Pangilinan, suportado din niya ang proyekto ni Moreno na paglalagay ng CCTV cameras sa buong lungsod.
Idinagdag pa ni Pangilinan na malaking karangalan sa kanila ang signing ng memorandum of agreement para sa paglaan ng mabilis at libreng Smart WiFi.
Handa rin si Pangilinan na mag-donate para sa pagpapatayo ng fountain sa Bonifacio Shrine na ilang hakbang lang mula sa city hall.
Nagpasalamat naman si Moreno kay Pangilinan sa pagiging ‘generous’ at umaasang hindi magsasawang tumulong sa mga proyekto ng Maynila na pakikinabangan ng marami.
- Latest