Salvage victim na Chinese looking, itinapon sa Smokey Mountain

MANILA, Philippines — Isang bangkay ng lalaki na nakagapos ang mga kamay at paa, nababalot ng packaging tape ang mukha at mara-ming hiwa at galos ang katawan ang natagpuan sa likod ng isang container  sa Road 10  sa Smokey Mountain, Tondo, Maynila, kamakalawa ng gabi.

Inilarawan ni Insp. Dennis Javier, hepe ng follow-up team ng Manila Police District-Homicide Section, inaalam pa ang pagkakilanlan ng biktimang inilarawan sa edad na 20-25 anyos, nasa 5’10 ang taas, katamtaman ang katawan, nakasuot ng itim na sweat shirt, pantalon na kulay brown at green ang sapatos.

Isang pahinante ng truck ang nakadiskubre sa bangkay alas-10:30 ng gabi nang magtungo siya sa container van.

Naniniwala ang pulisya na posibleng tinorturte muna hanggang sa mapatay ang biktima sa ibang lugar at doon lamang itinapon sa pinagkatagpuang lugar.

Nakuhanan sa bulsa ng pantalon ng biktima ang dalawang sachets ng shabu.