MANILA, Philippines - Basag ang bungo ng isang 36-anyos na lalaki matapos sumalpok sa mataas na bangketa ang minamaneho nitong motorsiklo kahapon ng madaling-araw sa Taguig City.
Nasawi noon din ang biktimang si Allan Davis, ng Abitong St., Brgy. Comembo, Taguig City.
Sa imbestigasyon ng pulisya, naganap ang insidente dakong ala-1:30 ng madaling-araw sa north-bound lane ng kahabaan ng C-5 Road ng nabanggit na siyudad. Minamaneho ng biktima ang kanyang motorsiklo (NF-8361) at habang binabagtas nito ang madilim na lugar, hindi nito namalayan na may mataas na bangketa kung saan ito sumalpok at dahil sa lakas ng impact, ay tumilapon ito at naalis ang suot na helmet. Bumagsak sa konkretong semento ang ulo nito na naging sanhi ng daglian nitong kamatayan.