8 sugatan sa pagsabog ng LPG

Walo katao ang iniulat na na­sugatan sa naganap na mag­ka­hiwalay na pagsabog na LPG na naganap sa Pasig at Maynila.

Sugatan ang isang lalaki makaraang masabugan ito ng tangke ng liquiefied petroleum gas (LPG) matapos na mag­sindi ng sigarilyo sa loob ng kanilang bahay kamaka­lawa ng gabi sa Pasig City.

Kasalukuyang nilalapatan ng lunas sa UERM hospital sanhi ng tinamong mga sunog sa iba’t ibang bahagi ng kata­wan ang biktimang si Arturo Arevalo, ng Karangalan Vil­lage ng nasabing lungsod.

Sa inisyal na ulat ng pu­lisya, naganap ang insidente dakong alas-10:30 ng gabi ng umuwi ng bahay ang biktima galing sa isang Christmas party.

Nagsindi umano ng si­garilyo ang biktima pagpasok sa parte ng kusina ng bahay na siyang pinagmulan ng malakas na pag­sabog na ikinasira din ng ki­same at ibang parte ng ­kabahayan.

Naging maagap naman ang responde ng mga bum­bero kaya hindi na lumala ang sunog habang dinala ang bik­tima sa nasabing pagamutan.

Teorya ng Bureau of Fire Protection (BFP) ng Pasig police, posibleng sumingaw ang tangke ng LPG na gina­gamit ng pamilya ng biktima at dahil sa kulob ang kaba­hayan, kumalat lang sa paligid ang gas at ang pagsindi ng sigarilyo ng biktima ang siyang hudyat para umapoy ang kumalat na gas sa hangin na siyang dahilan ng pag­­sabog nito.

Patuloy pa rin ang imbesti­gasyon para malaman ang sanhi ng nasabing pagsabog.

Samantala, pito katao ang sinasabing isinugod sa mag­ka­kaibang ospital matapos sumabog ang isang may ‘si­ngaw’ na tangke ng LPG kama­kalawa ng hapon sa Sampaloc, Maynila.

Sa inisyal na ulat ng Ma­nila Fire Department (MFD), dakong alas-12:51 ng hapon ka­maka­lawa nang sumabog ang isang tangke ng LPG sa loob ng Baby Blue laundry sa #1238 Cas­tañas St., Sampaloc.

Malubhang nasugatan at nasunog ang mukha at kata­wan ng mga trabahador ng nasabing laundry na kini­lalang sina Leo­nida Loyola, 54; Jimmy Tabuldo, 44; George Tabuldo, 21; Richard Indocil, 19; Jole Mana-ay; Bertucio Requito at Rusbina Forsana.

Wala namang sunog na na­ganap subalit ang pag­sabog umano ay lumikha ng ma­laking pagkawasak sa ding­ding ng maliit na laundry. (Edwin Balasa at Ludy Bermudo)