Patay ang isang hindi pa nakikilalang holdaper makaraang makipagbarilan umano sa mga miyembro ng Quezon City Police District (QCPD) matapos na holdapin ang isang taxi driver kahapon ng madaling-araw sa naturang lungsod.
Patuloy pa ring inaalam ng mga awtoridad ang pagkakakilanlan sa napaslang na suspek habang nakatakas naman ang dalawa nitong kasamahan.
Sa ulat ng QCPD-Station 1, naganap ang barilan dakong alas-5 ng umaga sa Araneta Avenue malapit sa Sto. Domingo Church. Nabatid na sumakay ang tatlong suspek sa taxi sa may Caloocan City at nag pahatid sa Quezon City bago nagdeklara ng holdap.
Namataan naman ng mga nagpapatrulyang pulis ang kahina-hinalang kilos ng mga suspek sa may Banaue St. na nagresulta sa habulan. Nang makorner, nagpaputok umano ang mga salarin kaya gumanti ang mga pulis. Isa sa tatlo ang nasawi, habang nakatakas naman ang dalawa nitong kasamahan.
Samantala, isang lalaki naman ang nasawi sa may Sampaguita St., Brgy. Capri, Novaliches, Quezon City makaraang pagsasaksakin ng may 10 lalaki. Nakilala ang biktima na si Larry de Guzman, 35, truck helper.
Nabatid naman na dati umanong nakulong ang suspek at napalaya lamang nang mabigyan ng parole. Hindi pa naman mabatid ang motibo sa naturang pamamaslang. (Danilo Garcia)