Parak, emisaryo timbog sa kotong

Nalambat ng mga opera­tiba ng Drug Enforcement Unit ng Taguig City  Police Station ang isang  tiwaling pulis na pinaghi­hinalaang kasapi ng “Taguig Ninja“ at ang kasabwat nitong ba­baeng emisaryo matapos na ireklamo ng pangongotong sa isinaga­wang entrapment operation   sa Taguig City.

Kinilala  ang naarestong suspect na  si PO2 Ruchyl Gasid, kasapi ng Anti-Illegal Drugs Investigation Division Special Operations Task Group ( District Enforcement Unit ) DEU  ng Taguig Police Station. Gayundin  ang kasabwat nitong si Elsa Upan na hindi nakapalag matapos na posasan ng arresting team ng pulisya. 

Ang dalawa ay inaresto sa ak­tong  tinatanggap ang  P70,000 marked money mula sa Geralsa Languiab, asawa ng nakakulong na si Sidin Lan­guiab na inaresto ng grupo ng nasa­bing parak na kasapi ng “Taguig Ninja”. Ang “Taguig Ninja” ay isang grupo ng mga tiwaling pulis na sangkot umano sa hulidap. 

Base sa reklamo ni Gng. Lan­guiab,  Mayo 14 nang sala­kayin ng nasabing pulis  at ng isa pa nitong kasamahan ang kanilang tahanan saka inaresto ang kaniyang mister. Naghalug­hog umano sina Gasid  maging sa kisame ng kanilang tahanan at ng walang makitang droga ay tinangay ang diver’s watch ng kanyang asawa, dalawang cell­phone at ang pera nitong P100,000 na di pa nakuntento ay binitbit ito at ikinulong pa  sa presinto ang kaniyang mister.

Sa pamamagitan naman ng emisaryong si Upan , sinabi nito na humihingi umano si Gasid ng P 50,000 kapalit ng kalayaan ng kanyang asawa para ’di na ituloy  ang kaso laban dito. 

Ang nasabing halaga ay pina­ dagdagan pa umano ng P20,000. Dito na inihanda ang bitag sa grupo ng suspect na nag­resulta sa pagkaaresto sa dalawa. Sa nasabing pay-off ay naka­takas ang isa pang suspect na kini­lalang si PO2 Ronnie Fabroa.