Kaluha sa swerte

Bisperas sa Pasko. Adunay raffle draw nga gipasiugdahan ang mga opisyal  sa Barangay Talisay. Nagtangag kini’g dagko nga mga premyo.

Nagkatapok ang mga molupyo ning alas siyete sa kagabhion nga maoy isugod sa maong kalihukan. Diha sab si Gemma uban sa mabagang duot sa mga tawo   sa plaza sa barangay hall.

Namasin siya nga makuotan ang bisa’g usa lang sa tulo ka ticket nga iyang gipalit. Gihurot na lang niya ang kinse pesos nga salin sa gipalitan niya’g bugas ug sardinas.

Nakalukso si Gemma sa kalipay kay mingdaog ang usa ka ticket niya isip consolation prize. Wala lang una siya mouli. Nakahukom siya nga humanon na lang gyud niya’g tambong ang maong kalihukan bisa’g midaog na siya’g usa ka sakong ganador.

Dihang major prizes na ang gibola ingon sa dili mamilok ang mga mata sa nanambong. Puno sila sa kahinam kanang paigoton sa announcer ang ticket nga nabunotan.

Nadugangan ang kalipay ni Gemma kay mingdaog sa ikaduhang ganti ang lain niyang ticket, nga nagtangag og premyo nga LED TV 29! Daghan sa mga nanambong ang gibati’g kaibog sa swerte ni Gemma.

Unya ingon sa minghunong ang mga gininhawa sa mga nanambong tungod sa kahinam dihang gikuot ni Konsehal Francis, ang tigbola, mao na ang ticket alang sa unang ganti. Tanan nangindahay nga maoy makaangkon niini.

“Ug ang mananaog sa unang ganti ang ticket nga nagtangag sa numero 238”. Singgit sa announcer” si Gemma gihapoon!”

“Grabeha’s swerte ni Gemma, uy!” diha’y misinggit.

Ingon sa dili makatoo ang mga tawo. Hasta si Gemma ingon sa naamang tungod sa iyang swerte nga naangkon karong Paskoha. Nanghingapin ang iyang kalipay samtang midawat sa yawe sa motorsiklo nga maoy ganti.

Didto sa unahan, misuot sa mga tawo si Dalen iyang kumare. Nagdali kini nga miduol kang Gemma.

“Mare, si Jr. nga imong anak nabutha’g whistle bomb,” matud ni Dalen nga puno sa kahingawa ug kakuyaw,” naputol ang iyang mga tudlo sa tuong kamot ug napisok ang pikas mata.”

Ingon sa gibubo-a’g bugnaw’ng tubig ang gibating kalipay ni Gemma. Nagdali siyang mikuyog kang Dalen biniyaan ang mga premyo. (Katapusan)