Isla Paraiso

Gula 189

“Nasayod na tingali kamo sa nahitabo sa uban tang mga kauban nga mitulis sa Unity Bank kagahapon,” maoy sugod ni Col. Villadar. “Nagkagrabe  na ang mga panghitabo. Sagunson na kaayo nga napatyan kita’g mga sakop sa pundok ug napakyas ang atong operasyon gumikan sa pagsamoksamok sa kapolisan.”

“Dili ba diay nimo kontrolado ang tanang kapolisan, Boss?” Usa sa iyang mga sinaligan nga bangason ang nangutana.

“Dili nako mabusalan ang mga ilong sa tanang sakop sa kuwerpo sa kapolisan,” nagkanayon ang koronel, “ilabi na ang mga sakop ni Capt. Sancho Benale. Mga gahi og ulo ang iyang mga sakop.”

Kahilom.

“Dili ko buot nga magpadayon kining hitaboa,” matud na usab ni Col. Villadar, “nga kanunay lang mopalpak ang atong operasyon ug mapatay sa mga tinugyanan sa balaod ang atong mga sakop.”

“Unsa man ang buot mo nga among buhaton karon, Boss?” Nangutana na usab ang bangason.

“Gusto ko nga mahipos na kana si SPO3 Rey Corpuz,” nagkanayon si Col. Villadar. “Apan dili masayon ang paghipos kaniya. May talagsaon siyang abilidad busa kinahanglan planohon pag-ayo ang mga lakang batok kaniya.”

Mibanos na usab ang kahilom. (Sumpayan pa)