Nasayran gyud

Dear Tita Salie,

Hello! Maayong adlaw. Usa ko sa mga nagsunod niining imong column. Ug nalipay ko pag-ayo nga modawat ka ug mo-entertain sa bisan unsang problema.

Tawga lang ko og Jiev, 16 years old ug nagtungha pa sa high school diri sa among lugar. Ang akong problema, Tita Salie, mao kining kabahin sa akong lovelife.

Duna man gud ko’y crush, Tita Salie, diri lang sa among room. Meaning nga ako siyang classmate. Ako lang gitago ang akong feelings ngadto kaniya. Tungod kay maulaw ko ug ako usab siyang friend.

Apan sa kadugayan nasayran gyud niya nga naibog ko niya. Ug maoy hinungdan nga nasuko siya nako.

Dili ko gusto nga maguba ang among friendship, Tita Salie. Ako na lang tagoan ang akong feelings kaniya basta magkabalik lang gyud ang among friendship. Unsay maayo nakong buhaton? Palihug pasabta ko. Thank you very much.

* * *

Good day,

Natural lamang nga maibog o ma-crush. Gani ang uban elementary pa lang apan aduna na sila’y mga crush.

Mas maayo seguro nga imo lang unang tagoan o iluom ang imong pagbati aron dili ka ma-distract sa imong pagtuon. Ug maybe mao usab seguro kini ang hinungdan kun nganong masuko nimo ang imong crush tungod kay dili pa siya gusto nianang mga butanga.

Mas maayo kun magpabilin ang inyong friendship ug aron usab dili maapektuhan ang inyong pagtuon kay tingali kun dili na unya mo maka-concentrate sa inyong pagtuon kun inyong sudlan ang gugma karon nga nagtungha pa lang kamo. Huwata hinuon nga muabot ang hustong higayon, ang panahon nga kamong duha andam na. -- Tita Salie