Luha sa paghigugma

Giparada ni Allan ang iyang kotse sa atubangan sa usa ka nitso nga marmol sa sulod sa Queen City Memo-rial Park gibasa niya ang pangalan nga nakasulat ug wala siya masayop, pangalan kadto sa iyang asawa nga nitaliwan na, si Belinda.

Nikanaug siya bitbit ang mga presko nga buwak nga napalit niya sa usa ka flower shop ug gihalad niya sa ibabaw sa lubong sa iyang asawa. Gikuot niya ang lighter nga gituyo niya pagpalit dungan sa duha ka dagkong kandila ug gidagkotan niya kini. Dungan sa pag-aso sa mga kandila ug sa pagsiga niini nipanaw ang iyang panumduman sa mga nangaging kagahapon.

“Love, dili nako magdugay ibilin ko kanimo si Virgie ug hinaut unta nga isipon nimo siya nga imong tinood nga anak ipanaad mo kanako, love” naghingutas nga mga katapusang pulong ni Belinda.

“Ayaw kabalaka love,” tubag niya nibawos siya sa paghagawhaw, “ipanaad ko kanimo ang maayo niyang kaugmaon, ugma damlag, love isaad ko kana kanimo.” Mao ra kadto ang gihulat sa iyang asawa ug nipiyong na kini natuay na ang ulo timaan sa pagkabugto sa gininhawa niini.

Trese anyos na ang edad ni Virgie kaniadtong panahona ug nag eskwela sa high school, anak siya sa pagkadalaga sa igsoon ni Belinda nga si Sonia apan sa pagka disgrasya niini sa eroplano kauban ang iyang pamanhonon nga taga Denmark sila na ang nagmatuto sa bata labi na nga wala sila tugahi og anak sa ilang kaminyoon ni Belinda. Nakapanghupaw siya ug gibati niya ang hilabihang kahaw-ang sa iyang kinabuhi karon. Natugaw ang paghandoraw ni Allan sa dihang adunay taxi nga niparada luyo sa iyang kotse. Nanaug ang usa ka maanyag nga dalaga nga may bitbit usab nga pungpong sa bulak ug niduol kini kaniya, nahibulong siya kay nihalok kini sa iyang aping.

“Dad, ako kini si Virgie unom pa lang katuig ang nanglabay nakalimot kana nga imo kong gihatud kang lola sa Dumaguete una ka molarga padulong sa Singapore,” kalit nga misantop sa hunahuna ni Allan ang sinagop nila nga batang si Virgie, apan wala siya magdahum nga ingon niini katahum nga dalaga. Hugot kini nga migakos kaniya ug naghilak.

“Pasensya kana, Virgie este anak, sori kaayo kay nidiretso ang flight kagahapon ug abi sad nako og nahikalimot kana,” tubag ni Allan.

“Dad, mag twenty na ako ug usa na ka nars gihandum ko ikaw samtang didto ka sa layong dapit, dili ug dili ko mahikalimot sa imong mga pag-amuma ug pagtabang kanako, Dad,” ug niatubang na si Virgie kaniya nga naghilak.

“Dad, kutob karon dili na kita  magkabulag gipananghid ko na kang Mommy ug Lola nga alagaran ko ikaw sa tibuok kong kinabuhi, Mahal Kita Dad, you are my ideal man and wanted you to be my partner, forever.”

Wala na ang pagduhaduha sa hunahuna ni Allan, naglibog siya ug unsay iyang buhaton ilabi na nga nag-init ang iyang kalawasan kay gituyo man ni Virgie ang pagdapat sa iyang mga ngabil sa ngabil ni Allan. (Katapusan)