Swerte sa Bukid - Gula 4

Gikahinangop kaayo ni Sandra ang tanyag ni Ruel nga balikon nila ang naabereya nga sakyanan sa mestiza-insik didto sa bukid sa Barangay Pamutan.

“Salamat g’yud kaayo Ruel ha kun matabangan ko nimo nga atong makuha ang akong awto,” matud ni Sandra nga migunit sa bukton ni Ruel tungod sa kalipay.

Nakahinumdom si Ruel nga duna siya’y electric fuel pump nga gitangtang gikan sa iyang awto ug gitagoan ra didto sa iyang tool box sa grahe. “Tana Sand, masulbad ra nato karon ang imong problema,” ni Ruel pa.

Gikan sa Waterfront Hotel, misakay sila pagbalik sa kotse ni Ruel ug mihapit didto sa grahe sa iyang sakyanan. Dihang nakit-an na ni Ruel ang gitipigan niya nga fuel pump gisuwayan niya kun maayo pa ba ang kondisyon niini.

“Maayo pa lagi Sand, tana balikon nato ang imong kotse sa bukid,” matud ni Ruel nga nagbitbit sa electric fuel pump. “Nahasol na g’yud hinoon ka Ruel da, unsa kaha’y akong ikabawos kanimo,” matud ni Sandra.

Wala motubag si Ruel. “Kanindot unta kun ang akong mahimong boyfriend mao ang lalaki nga sama kanimo ka buotan,” ni Sandra pa nga migunit na gayud sa abaga ni Ruel samtang nagmaneho sa sakyanan tungas sa karsada sa kabukiran.

Mipahiyom ra si Ruel ug gitimbang-timbang niya ang mga pulong nga iyang nadungog gikan ni Sandra. “Kun ako’y makabaton og girlfriend nga sama kanimo kagwapa ug kabuotan Sand, pakamatyan g’yud nako,” nagpalabtik na usab og estorya si Ruel.

Takulahaw lang mibunok ang uwan. Kusug g’yud kaayo ang uwan nga mobunok didto sa bukid. “Dimalas uy, kusog kaayo ang uwan nga duol na man unta ta sa Barangay Pamutan nga gibinlan nato sa imong awto,” matud ni Ruel.

Mihinay pagpadagan si Ruel sa kotse kay migabon ang kabukiran ug halos dili na makita ang karsada nga ilang agian. Hangtud nga miabut na sila sa dapit nga nahimutangan sa kotse ni Sandra.

“Dia na ta apan ang problema kay dili nato mataud ang electric fuel pump kay pwerteng kusoga sa uwan,” nagpanlingo si Ruel. “Sagdi lang gud, dia bitaw ta sa sulod sa kotse, dili man  ta mabasa,” dali nga tubag ni Sandra.

Dayon, mikalit sila pagkahilom. Taud-taud. “Tam-is kaayo ka manulti Ruel no, tiaw mo nga ingon ka andam mo pakamatyan ang babaye nga sama kanako,” giingnan ni Sandra si Ruel. “Bitaw San, wala ko magkomedya. Sama karon, wala man gani ta’y relasyon pero nagsakripisyo ko nimo,” ni Ruel.

Daw inanay nga nalukmay si Sandra sa mga matam-is nga pulong ni Ruel. Nakahuna-huna si Ruel nga pahimuslan ang higayon. (Sumpayan)