May mensahe ang Ginoo sa pagkuha ni Robredo

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Mag-unsa man ang kumpay kun wala na ang kabayo? Mag-unsa man ang medalya sa pagpasidungog kun ang sab-itan niini patay na? Nganong kun buhi pa ang tawo, bisa’g unsa siya kabuotan, aduna man gyu’y mosaway? Apan kun mamatay, ang tanan modayeg na kaniya?

Sa buhi pa si anhing DILG Secretary Jesse Robredo, ubay-ubay’ng politiko ang miangal ngano siya ang gipili ni Pangulo Noynoy Aquino? Luyo sa iyang mga mabungahong kakugi, may mga anino nga sa iyang likod hilom nga mitamihid kaniya. Adunay mga masinahong kamot nga nagtapok og mga sagbot nga gidam-ok sa iyang pagkatawo aron ang tinuod nga bulok sa iyang kinaiya matakpan sa kahugaw.

Sa iyang pagka-sekretaryo sa DILG, bisa’g kanunay makita iyang nawong sa mga mantalaan ug telebisyon, wala gyu’y laing nakaila ug nakasinati sa tinuoray nga lifestyle ni Robredo, gawas sa taga Naga, City, Bicol, diin 19 ka tuig niya kining gialagaran. Sa laktod, buta ang katawhan sa nasud kinsa si Robredo? Gani, tungod sa mga hugaw nga usahay isabwag sa iyang mga kauban ra usab sa politika ngadto kaniya, nagtuo ang kinabag-an nga sama ra pud siya’g balhibo kanila, maayo lang sa sulti unya wala sa buhat.

Apan pagkamatay ni Robredo, naguol si Pangulong Noynoy Aquino. Daw nawad-an siya’g bahandi. Miistar gyud siya’g duha ka-adlaw sa baybayon sa Masbate aron mandoan ang mga kasundalohan sa nagkalain-laing brigada nga pangitaon ang nahulog nga ayroplano. Kini wala’y labot sa mga sea divers, mananagat ug foreign forces nga miayuda taliwala sa kalawom sa dagat.

Tataw kaayo nga puno sa kahinugon, kahingawa ug kasubo ang dagway ni Aquino sa pagkawala ni Robredo. Wala kini maka-ipsot sa abtik nga mga tigpaniid. Nganong ingon man niini ang gibati sa Presidente sa Pilipinas? Kinsa ug unsa man diay kini si Jesse Robredo?

Naintriga’g samot ang media. Wala lang sila moapil pagsawom sa dagat; kun dili, gikawot gyud nila ang bungdo sa bagang abog nga mitabon sa tinuoray nga pagkatawo ni Robredo. Ug didto sa kahiladmang bahin, napalgan nila ang tiunay’ng mithi sa DILG secretary nga sama sa bulawan, migilak lang gihapon ang kasanag bisa’g gilubong pa sa lapok.

Pagkamatay ni Robredo, misilang ang bag-ong kabuntagon nga nagladlad unsa diay ang kaanindot ug kabayanihon sa iyang mga nabuhat ngadto sa katawhan. Ang pagpaambit sa iyang kabuotan sa mga kabos ug adunahan nga sa hilom iya lang gitago, daw gamhanang bomba nga mibuto sa tibuok kalibotan. Nakapahigmata sa mga nakatulog nga politiko. Nakapaigking sa mga hiwig taras. Ug nakasabwag og mga espirituhanong ehemplo nga makaluwas sa daghang karnero nga nahisalaag. Namatay man tuod si Robredo, apan nagbilin siya’g buhing mga tunob nga angay’ng kapanaminan sa tanan. Sa iyang pagkamatay, milyon ka milyong mga kasingkasing ang miidolo kaniya.

Mao kini ang mensahe sa Ginoo sa iyang pagkuha ni Robredo: “Magpabiling lugas ang liso sa trigo kun kini dili ipugas sa yuta ug mamatay. Apan kun mamatay, mamungag daghan.” Juan 12:24. ( Javier Y. Tapulado, Banawa, Cebu City)