Ambisyosa

Gula 4

Milugnot si Lenie dihang mihana na usab paggakus kaniya si Cardo. Midagan siya sa pultahan ug gisuwayan pag-abli, apan wala gayud kini maabli. Misinggit si Lenie taman sa ginhawa. Nangayo siya’g pakitabang, apan igo lang mikatawa si Cardo.

Namatngonan ni Lenie nga nagkumkom pa diay siya sa lima ka tagsa ka libo ka pesos nga gihatag kaniya ni Cardo. Iya kining giitsa sa sawog samtang nagsugod na siya sa paghilak.

“Dili na ako modawat nianang kwarta ha Noy Cardo! Mopahawa na ko dinhi! Hu..Hu..Hu.. Ablihi ang pultahan! Tabang! Tabang!” naghilak na pag-ayo si Lenie nga nagpaninggit.

Apan igo lang mikatawa si Cardo. “Ayaw na’g usiki ang imong tingog Lenie, walay makadungog kanimo kay dunay sound proof kining akong kwarto. Dili ka usab makagawas kay automatic lock ang siradora sa akong pultahan.”

“Tabang! Tabang Ma! Tabang Ma!,” naghilak ug mibakho na g’yud si Lenie. “Maluoy ka tawon nako Noy Cardo!” ni Lenie pa nga nakasabot na sa tuyo kaniya sa bag-o niyang agawon.

Apan wala tupha og kaluoy ang kasingkasing ni Cardo. Gigunitan niya ang kamot ni Lenie ug gigakus pag-ayo. Giromansa ni Cardo si Lenie nga naglimbag-limbag sa paninguha nga makalingkawas.

Gibiyaan ni Cardo si Lenie ug miadto kini sa iyang lamesa, duna kini gikuha nga daw panapton. Mibalik kini sa nahimutangan sa dalaga nga nagpadayon sa pagbakho.

“Ayaw..ayaw tawon ko’g binuangi Noy,” nagpakiluoy si Lenie, apan gigakus siya pag-usab ni Cardo ug gitapion sa iyang ilong kadtong panyo nga gikuha niini gikan sa hunos sa iyang lamesa.

Inanay’ng nalipong ug nawad-an og panimuot si Lenie. Giaswat ni Cardo ang walay panimuot nga dalaga ug gipahiluna kini niadtong higdaanan. Misunod ang kamingaw sa tibuok lawak.

Gitagbaw ni Cardo ang iyang kaibog ngadto sa dalaga. Taud-taud nahigmata ang dalaga, apan diha na ibabaw sa hubo niyang lawas si Cardo.

Igo na lang sa paghilak si Lenie. Kalit nga misantop sa iyang kaisipan ang iyang inahan nga mipugong gayud kaniya nga molangyaw sa Cebu.

Mibangon si Cardo gikan sa ilang gihigdaan. “Ihatag nako kanimo pagbalik ang kwarta Lenie…magamit kini nimo. Ayaw kaguol kay dakung kwarta ang nagpaabot kanimo dinhi sa Cebu. (Sumpayan)