Hinog sa punoan - Gula 89

Sulod sa lawak, giatiman ni Urielle si Patrick. Iya kining giilisan. Unya gitrapohan niya kini’g init nga tubig.

“Ch-Chariz...” Namulong si Patrick apan nagpabiling nagpiyong ang mga mata niini. Ingon sa wala kini makamatngon sa gisulti niini.

Misanting ang mga dalunggan ni Urielle sa iyang nadungog. Naglagot siyang namati kang Patrick nga nagpanangpit sa ngalan ni Chariz. Klaro na gayod kaayo nga si Chariz pa gihapon ang gihigugma ni Patrick, niya pa sa hilom.

“Chariz...” Misangpit na usab si Patrick sa ngalan sa kanhi niining hinigugma. “Chariz, ayaw ko’g biyai...”

Misamot ang kalagot ni Urielle. Gidugangan gayod ni Patrick ang gibati niyang pangabubho pinaagi sa pagpunay niini’g sangpit sa ngalan ni Chariz.

“Chariz...” Sangpit ni Patrick dungan ang paggakos kaniya. Nagpiyong gihapon ang mga mata niini, ingon sa dili mabuka tungod sa kahubog.

Nakalitan si Urielle sa paggakos ni Patrick kaniya. Unang higayon kini nga nabatyagan niya ang gakos ni Patrick. Apan naglagot siya kay ang ngalan ni Chariz maoy kanunay gisangpit niini samtang naggakos kaniya. Nasaypan tingali siya ni Patrick nga mao si Chariz. Wala na kini makamatngon tungod sa kahubog.

Sa iyang kalagot, giwakli niya ang mga kamot ni Patrick aron makalingkawas siya sa paggakos niini kaniya. Apan nahawiran siya ni Patrick ug gigakos siya niini’g hugot kaayo. -- Sumpayan pa