Tsiks killer

Gula 27

Misamot nga wala na gayud makapamakak si Mar nga siya ang radio announcer nga kinaham ni Vivian matag gabii dihang wala niya mabantayi, kalit mitingog ang UHF radio nga gitagoan niya sa iyang hawak.

“Da, dili na g’yud makalimod, ikaw g’yud lagi si Mar,” mingisi pag-ayo si Vivian. Nahimong maya kaayo sila. “Ang imong tingog sa radyo Kuya Mar mao ra g’yud gihapon sa personal,” matud ni Connie nga ig-agaw ni Vivian.

Giulog-ulogan tingali si Mar sa bag-o niyang mga kaila dihang giingnan siya nga mga kinaham nila ang mga awit nga sagad niya ipatugtog sa programa ingon man ang iyang mga background music.

“Buyno, alas nueve na man diay sa gabii Vian. Moadto na ko sa estasyon kay mag-programa na ko,” matud ni Mar. Sa wala pa siya molakaw, may gihunghong siya ni Vivian.

“Duna ko’y kanta nga para nimo ha akong ipatugtog karon sa akong programa. Sabta pag-ayo ang lyrics. Pero ako lang ipatuo nga gikan sa usa ka Romy,” matud ni Mar. “Sige gud ikaw bahala, maminaw mi diri,” ni Vivian.

Miangkas gihapon si Virgilio sa motorsiklo ni Mar paingon sa estasyon. Nagkataw-anay sila. “Gwapa tuod g’yud si Vivian da. Mosugot kaha na kun akong panguyaban Vir?”

“Ikaw pa? Hundred percent g’yud noon nga mosugot na nimo Mar,” dali nga tubag ni Virgilio.

Sa programa ni Mar, giandam na niya ang music nga gisaad niya nga ipatugtog para ni Vivian. Daghan gihapon ang mga bisita ni Mar sa estasyon nga iyang mga tigpaminaw.

Gipatugtog dayon ni Mar ang iyang background music. Iya kining gipahinayan nga daw molutaw ang iyang tingog sa tumang kabugnaw.

“Diay suwat nga atong nadawat, gikan sa usa ka Romy. Nag-request siya og awit Just Tell Me You Love Me kay iya kuno kini nga i-dedicate kang Vivian nga nag-birthday ug naminaw karon sa atong programa,” dayon gipatugtog ni Mar ang awit.

Gisabut pag-ayo ni Mar ang mga pulong sa maong awit. Daw nanguyab kini sa usa ka babaye.

Human sa programa, gitawag si Mar sa technician. May mitawag sa telepono ug buot makig-estorya kang Mar.

“Hello Kuya, si Vivian ni, balik baya mo diri ha kay maghuwat mi si Connie. Kuyog gihapon mo si Virgilio.” Nagpahiyom si Mar nga misugilon ngadto ni Virgilio nga pabalikon sila ni Vivian.

“Tan-awa, nakagusto lagi na nimo Mar,” nagngisi si Virgilio nga miagbay sa higala niyang announcer. Pagpamauli sa mga bisita ni Mar, mipasirit dayon sila sa motor si Mar ug Virgilio.

Wala madugay, didto na sila sa balay ni Vivian. “Ah, pagka meaningful usab niadtong imong gi-dedicate nga kanta ni Vivian Kuya uy,” matud ni Connie. (Sumpayan)