Nagtakoban nga pagbati

Gula 80

Wa nay kahigayonan pa, Efren. Nagduko kini nga ingon sa gibuboan og usa ka baldeng kinilis. Dili makapataas ang lalaki sa agtang niini.

“Kini na ang kataposan natong panagsulti, Efren,” matud ni Denia. Hangyoon ko lang ka nga ayaw na ko’g samoka. Malipayon ug malinawon ang akong pagpuyo nga wala ka sa akong kinabuhi.”

Kaha nakasabot nga wala na gayod siya’y interes nga makigbalik, si Efren maluyahon nga nanamilit. Huyhoy ang mga abaga niini nga mikanaog sa pinuy-anan nila ni Denia.

Gitak-opan gilayon ni Denia ang pultahan sa dihang nahikanaog na si Efren.

Nianang pagkaugma, gitiwas ni Denia ang pagpanglimpiyo sa tugkaran sa ilang balay. Giguna niya ang mga sagbot ug gidaoban.

Unya napahunong siya sa iyang gibuhat sa dihang nakamatikod siya nga may sakyanan nga mihunong sa tungod sa ilang balay. Milingi siya ngadto sa karsada nga may gilay-ong napulo ka metros sukad sa iyang nahimutangan.

“Hu!” Mao na lang ang kahikugang ni Denia sa dihang iyang nakita ang lalaki ug babaye nga nanaog gikan sa V-hire.”

Sila si Mr. Manolo Ricarte ug Mrs. Lucia Ricarte ang nahiabot.

Kalit kaayong midumbol ang kakulba sa dughan ni Denia. Wala siya magdahom nga mahiabot sa ilang dapit karon ang iyang mga agalon nga taga Cebu.

Nakuhaan og diyotay ang iyang tensiyon sa dihang nakita niya ang kahinangop nga misihag sa mga ngabil sa magtiayong Ricarte sa pagkakita kaniya. -- Sumpayan pa