Nagtakoban nga pagbati

Gula 45

Nakakita si Mrs. Ricarte ninyo ni James nga nanggawas kaganina gikan sa music room. Nagpakisayod siya kanako kon wala ba ko’y nasayran bahin ninyo ni James. Nagtuo siya nga nangulitawo si James kanimo. Ug nakugang siya sa dihang akong gitug-anan nga dili maayo ang gipakitang pagtagad ni James kanimo.”

“W-wa na lang unta nimo tug-ani si Mrs. Ricarte mahitungod niini Nang.”

“Sagdi lang gud, Day. Mas maayo hinuon nga masayod siya sa binuhatan sa iyang anak.”

Natukmaan ni Denia si Mrs. Lucia Ricarte nga naglingkod sa sopa sa may sala. Nagtuo siyang sa sala lang sila mag-estorya apan gidala siya niini ngadto sa taas. Misulod sila sa lawak sa magtiayong Ricarte.

Wala kapugngi ni Denia nga mobati’g kaulaw ug kataha ngadto ni Mrs. Ricarte.

Gipatawag ko ikaw tungod kay may ihangyo ako kanimo,” nagkanayon si Mrs. Ricarte sa tingog nga puno sa kaaghop.

“U-unsa kana, Ma’am?” Sukit ni Denia.

“Nasayod na ko nga dili diay maayo ang pagtagad nga gipakita ni James kanimo,” matud sa agalon nga babaye.

Miduko lang si Denia nga wala magtingog.

“Hangyoon ko unta ikaw sa pagsabot sa gipakitang taras sa akong anak karon,” ni Mrs. Ricarte pa. “Dili siya ingon niana kaniadto. Tungod tingali sa pagluib sa iyang hinigugma maong naingon siya niana.” -- Sumpayan pa