Ang Tinagoan

(Kining maong nobela gibase sa matuod nga kaagi ni Dinah.)

Nalipay si Dinah nga nadala gyod niya sa hangyo-lubo si Padre Gio ug misugot na kini nga magkita sila nianang pagkaugma. Giplansa dayon ni Dinah ang plano kun asa sila mag-abot.

"Moadto ko ugma sa siyudad kay may mahinungdanon kong tuyo sa province schools division superintendent," nagkanayon si Dinah. "Magkita ta didto."

"Asang dapita man lagi ta mag-abot?" sukit ni Padre Gio.

"Sa UCV Mall. Magpaabot ko nimo sa usa ka kan-anan sulod sa maong establisamento. Tua na ko didto mga 1:30."

Pagkaugma, misakay si Dinah sa unang biyahe sa bus gikan sa lungsod sa Dalisay paingon sa siyudad. Pasado alas siyete sa sayong kabuntagon, nahiabot na siya sa dakbayan. Namahaw una siya.

Human makakaon, miadto na siya sa buhatan sa province school division superintendent. Maayo kay natagad dayon siya ug kadali rang nahuman ang iyang tuyo. Wala pay alas dose sa kaudtohon miadto na siya sa UCV Mall. Excited na kaayo siya sa umaabot nga panagkita nila ni Padre Gio.

Naniudto siyang daan aron inig-abot ni Padre Gio, ready na siya pagtuman sa iyang plano. Nahimuot siya sa hilom samtang naghunahuna sa iyang plano nga maoy gusto niyang mahitabo sa panagkita nila ni Padre Gio.

Wala pay ala una sa sayong kahaponon nahiabot si Padre Gio sa dapit nga ilang gikasabotan nga mag-abot.

"Salamat nga wa ko nimo indiyana," ni Dinah pa.

"Isulti dayon kun unsay imong tuyo," giingnan siya sa pari.

"Di ta dinhi magsulti. Mangita tag dapit nga duna tay privacy."

Ug gidala ni Dinah si Padre Gio sa usa ka hotel. Nagdumili unta ang pari pagkuyog niya apan iya kining gihata. She call his bluff!

"Gusto ka bang mag-eskandalo ug mag-hysterical ko dinhi aron mahibu'ng ang mga tawo kun giunsa ko nimo?" matud ni Dinah. (Sumpayan pa)