Dugos ni Eva

Misugot si Mr. Prax Vidoya sa sugyot ni Carlo nga patrabahoon ko isip katabang sa ilang panimalay. Ingon sa nahinangop gani ang hamtong nga Vidoya kay dugay ra kuno siyang nagplano nga mangita og makaabag sa ilang katabang nga si Nang Badang.

Gipatawag dayon ni Mr. Prax Vidoya si Nang Badang. Wala madugay, nahiabot ang lagas nga katabang sa sala ug gipaila ako ni Mr. Prax Vidoya ngadto niini.

"Sukad karon siya na ang imong kaabag sa mga buluhaton dinhi sa balay," matud ni Mr. Vidoya. "Ikaw nay bahalang motudlo kaniya sa mga buluhaton."

"Oo, Sir," mubong tubag ni Nang Badang.

"Sige," matud sa hamtong nga Vidoya. "Dad-a na siya ngadto sa servant's quarter. Pagkahuman, adto sa akong kuwarto kay may isugo ko nimo."

Dihadiha namiya mi ni Nang Badang sa sala. Gidala ko niya sa servant's quarter. Gitultolan ko sa lagas nga katabang sa kuwarto nga maoy akong katulganan. Magtagsa diay mig kuwarto. Nagtupad ang among kuwarto ni Nang Badang. May lain pang tulo ka kuwarto nga bakante sa servant's quarter.

"Ikaw nay bahala dinhi," matud ni Nang Badang dihang nakasulod na mi sa kuwarto nga akong katulganan. "Moadto una ko sa lawak ni Sir Prax kay magpahilot man kana siya nako kada gabii."

"Sige, Nang Badang," matud ko. "Ako nay bahala dinhi."

Paggawas ni Nang Badang sa lawak, akong gitrangkahan ang pultahan niini. Mipasopaso ko sa hawanan sa lawak. Wala madugay, dihay nanuktok. Akong giablihan ang pultahan aron pagsusi kun kinsa ang didto sa gawas. Pagkatukas sa palid sa pultahan, maoy misugat sa akong panan-aw ang pamayhon ni Carlo.

"Gihatod ko lang kini," nagkanayon si Carlo dungan ang pagtunol sa akong bag nga nahibilin didto sa iyang sakyanan. -- Sumpayan pa