Lani gimingaw sa SOP

Sama sa una nang nabalita dinhi sa Banat Hugyaw, usa ra ka buwan nga mo-istar si Asia's Nightingale Lani Misalucha diin labihan ka puno sa iyang schedule busa wala gayud siya'y pahuway. Nag-una sa listahan mao ang pag-promote sa iyang latest album ubos sa Universal Records nga matud pa mihalin na og 10,000 copies bisan pa man og walay promo kaayo sukad kini gipagawas sa market niadtong milabay nga tuig.

Ang "Lani Misalucha" album, kini maoy titulo sa labing bag-ong pambato sa album sa nahisgutang diva ug nagtangag kini og series of mall tours sa mga nagkadaiyang SM branches sa Luzon.

Gawas sa mall tours, naglinya pod ang iyang TV appearances sa mga nagkadaiyang show sa ABS-CBN, nag-una na niini mao ang una niyang lugwa sa ASAP 07 niadtong Domingo ug makita siya sa maong show sa laing upat pa ka Domingo.

Guest pod si Lani sa The Buzz sa susamang adlaw, ug duna siyay live appearance sa Pinoy Big Brother karong February 25, plus guestings sa Game Ka Na Ba, Your Song, MYX Live, Wowowee ug Wazz Up Wazz Up.

Apan ang mikaon og dakong oras sa pag-istar ni Lani dinhi sa Pilipinas mao ang rehearsals alang sa iyang "Lani Misalucha - Missing You" live concert sa Araneta Coliseum karong March 17. Si Rowell Santiago ang director niini ug si Louie Ocampo ang musical director. Ang maong major musical dalit sa XVR Events (new division of 105.1 Crossover) ug Petron Extra Unleaded, samtang major sponsor ang Mossimo ug sponsor pod ang Philippine Star.

Samtang giklaro ni Lani nga wala gayud siya hingpit nga mitalikod sa SOP sa GMA-7 diin usa siya sa mga haligi niini sa wala pa siya nanimpad sa Las Vegas. Gani matud niya gimingaw na siya sa nahisgutang Sunday variety show. Matud niya nga natayming lang nga usa ang ABS-CBN sa major sponsors sa iyang concert busa kinahanglan niya nga mulugwa sa nagkalain-laing show sa Kapamilya aron I-promote ang maong major event.