Unom sakpan sa aktong nangawat og kable
CEBU, Philippines — Unom ka tawo ang nadakpan sa kapulisan human naaktuhan nga nangawat og underground cable nga gipanag-iya sa usa ka telecommunications company sa Sikatuna Street, Barangay Zapatera, Cebu City, alas-5:20 sa kaadlawon, Domingo, Nobyembre 15.
Gidakop sa mga operatiba sa Pari-an Police Station 1 sa Cebu City Police Office ang unom ka mga suspek nga giila sa mga alyas nga Eric, 35; Janriel, 39; Daven, 32; Jesie, 30; Ronan, 42; ug Edwin, 51 anyos.
Matud sa kapulisan, usa sa mga nadakpan, si alyas Eric, kanhi technician sa maong telecommunications company. Ang mga suspek nagpuyo sa nagkadaiyang barangay sa siyudad, diin kadaghanan kanila taga-Barangay Basak San Nicolas.
Nasayran nga ang mga Barangay Public Safety Officers (BPSO) sa Barangay Zapatera ang unang nakamatikod sa mga suspek samtang nagpahigayon og patrol.
Nakita nila ang mga suspek nga mibitad sa underground cable hinungdan nga ilang gi-report dayon ang insidente sa kapulisan.
Dali usab nga niresponde ang mga operatiba sa Pari-an Police Station 1 ug nasakpan ang unom samtang nanguha pa sila sa mga kable nga walay gipakitang saktong dokumento.
Gidala ang mga nadakpan sa Parian Police Station 1 mag atubang og kasong pagpangawat. — /IBM (BANAT NEWS)
- Latest















