Pagbalhog ni Romualdez

Kon makakita si kanhi House speaker Martin Romualdez og lungag sa bungbong o sa sawog sa iyang selda sa male dormitory sa Quezon City Jail sa Payatas, hinaot nga iyang tagoan ang iyang nawong. Sa kauwaw. Tibuok semana nga nabantang sa tibuok nasud ang iyang katalawan.

Ambot unsay iyang gigamit. Kuwarta? Impluwensiya? O ang duha? Sa paghimong kengkoy sa mga doktor ug mga polis sa pagyango sa istorya nga kalit lang siyang nahimong himatyon. Nga dili mahimong prisuhon. Dili gani mapabangon sa higdaanan aron matarong ang booking procedure pagdakop niya.

Salamat sa third division sa Sandiganbayan ug sa mga espesyalista sa University of the Philippines-Philippine General Hospital (UP-PGH):

Sa mga mahistrado nga nipatigbabaw sa mga balaod human naleksiyon sa walay kinutoban nga lista sa mga sakit ug palusot nilang Senador Rodante Marcoleta ug ubang mga sinumbong nga nagpasakitsakit ug nidemanda og hospital arrest; ug

Ni Dr. Gerardo Legaspi, medical director, ug kaubanan sa UP-PGH nga wala mamilok sa ka-feeling hawod nilang Marcoleta ug Romualdez ug nisukol sa pagbinastos sa medisina isip taming sa gipasanginlan nga kurakot nga mga politiko.

Hinaot tinud-on pag-imbestigar ang mga doktor nga nagpagamit sa gamhanan nga mga pasyente pagpaburot sa mga sakit aron makalikay sa prisohan. Unahon ang mga doktor nilang Romualdez ug Marcoleta nga nangugat under oath sa Sandiganbayan nga peligrong mamatay ang mga pasyente bisan sa biyahe pa lang gikan sa ospital ngadto sa prisohan.

Angayng isalikway ang kultura sa tinabonay sa Philippine Medical Association ug Professional Regulation Commission sa pagtuman sa katungdanan pagpanalipod sa kaligdong sa propesyon.

Daghang salamat sa public opinion. Tungod sa wala nay kukauwaw nga mga eskandalo sa gobyerno, wala na motugot ang katawhan nga madugangan pa ang nagkataas nga listahan sa mga pangabuso sa gahom.

Ang walay hunong nilang pagbuyag sa kalapasan ug pagpaningil nga masilotan ang mga malapason nakapapugwat sa mga institusyon sa paghimo sa ilang trabaho. Ebidensiya kini nga ang tingog sa katawhan mao g’yud ang kinakusgang puwersa. Kon dili malipat ug dili mapahilom, maoy labing epektibong sumpa sa mga maniobra sa pagpamugos pagpahamtang sa binuang nga sistema sa hustisya: Nga langaw ray masangit pero ang kabaw molusot.