Buslot nga depensa

Kinakusgan nga depensa ni Bise Presidente Sara Duterte sa pasangil nga duna siyay kompaniya nga nakig-transaksiyon sa Davao City Hall nga gipangulohan sa iyang igsuon nga si Baste Duterte mao ang maisuong pag-insistir. Nga nasipyat siya.

Kon makumbinser niyang senator-judges nga sipyat ang paglista sa Gencorp Industries sa iyang Statement of Assets, Liabilities and Net worth (SALN), makalingkawas sa duha ka kalapasan: Pagpanag-iya og negosyo (nga gidili sa 1987 Constitution) ug pagpirma og kontrata uban sa iyang manghod (nga gidili sa Government Procurement Reform Act ug ubang mga balaod).

Mahimong gamiton ni VP Sara sa pagpagamay sa nahimo niyang sipyat ang tinuig nga report sa Gencorp ngadto sa Securities and Exchange Commission (SEC) nga wala maglakip sa iyang ngalan sa bisan unsang kapasidad sa kompaniya.

Mopasalig siya nga mas katuohan ang opisyal nga dokumento nga gipresentar ni SEC Director Gerardo del Rosario atol sa impeachment trial gahapon. Ug mosandig sa sulti ni retired Sandiganbayan presiding justice Amparo Cabotaje-Tang, saksi sa prosekusyon sa niaging semana, nga ang sipyat sa SALN dili maisip nga ebidensiya na sa kalapasan sa balaod.

Dunay problema ang depensa ni VP Sara. Gilista niyang Gencorp sa SALNs samtang mayor pa sa Davao City. Maisip tingaling sipyat kon aksidente lang nga naapil sa usa ka tuig. Pero gilista niyang Gencorp sa tanang SALN sukad nakalingkod sa pagka bise presidente niadtong 2022.

Mas lisod tuohan ang palusot kay niburot ang kita sa Gencorp human nahimong bise presidente. Ug ang kinadak-ang transaksiyon mao ang kapin sa ?14 milyones nga catering contract uban ni Baste. Angay sang mopasabot ang Gencorp nganong bisan sa kadako sa kita walay dibidendo ang shareholders.

Laing problema: Under oath ang SALNs. Si VP Sara mismo nipasalig nga lehitimo ang tanang tinubdan sa iyang kita ug matinud-anon ang tanang deklarasyon sa SALNs. Mas dako ang tulubagon kon namakak sa pag-angkon og kompaniya nga wala diay niya panag-iyaha.

Sa pikas nga bahin, kon mapamatud-an sa prosekusyon nga si VP Sara ang usa sa mga tag-iya (may puhonan man o wala), maproblema ang Gencorp sa SEC. Masilotan sa pag-palsipikar sa ilang general information sheet aron pagtago sa interes ni VP Sara sa kompaniya.