‘Puppy New Year’

LIFE talaga’y magulo at pabago-bago

At saka hindi ka makakasigurado,

‘Di agad darating sa tao nang timplado,

Kundi ba naman “IF” nga nasa gitna nito!

Nang sanggol pa lang tayo ay gustong-gusto

Ng magulang natin na TABACHINGCHING tayo!

Subalit pagtagal at tumatanda tao,

Sa salitang TABA diring-diri na kayo!

Isipin bang nun pag natastas pantalon mo,

Nagagalit ka’t sinusulsi agad ito!

Eh ngayon pag hindi sira para kang loko!

‘Yung sobrang wasak nga mas mahal pa siguro!

Hindi malayong papunta na mga tao

Sa pagiging TAONG GRASA ano tingin n’yo?

Ngek! He, he, he… ‘wag nama’t ‘di naman siguro

Basta ‘yung ABS magiging TABS din pagtanda n’yo!

Naku, maniwala kayo’t ‘yan ang totoo!

‘Yang mga pa-slim fit at tight ng suot ninyo —

Pababanat n’yo rin ‘yan sa balat ng face n’yo!

CHANGE sounds like CHAINS so, nakakadena na tayo!

Noon tanong ko — Bakit “change” SUKLI rin ito?

Dahil ba bayad mo pagbalik nagbabago?

For me, ang CHANGE, LIFE at SUKLI ay konektado

Kasi SUKLI means LIFE IS SO IKLI, enjoy mo!

Katulad bukas taon na ay magbabago,

Ang unang i-change n’yo ang inyong kalendaryo!

TWENTY EIGHTEEN na! The Year of the Brown Earth ASO!

So tatahol na ako — Happy New Year to you!

Year of the Brown Earth Dog ayon sa mga Tsino,

Opisyal na simula’y gitna pang Pebrero,

Kayumanggi’y brown, Earth ay lupa… o camino,

Hmmm… therefore panalo tayo! ASKAL ‘yung aso!

“Friendly” ‘yung year sa atin sa pakiwari ko,

“Man’s best friend” pinagbasehan ng Ang Poet N’yo,

Pero may kaba ring magkakagatan tayo

Kasi mga Pinoy kumakain ng aso!

Ngek! Pero mga paswerte ba’y ano-ano?

Ubra pang mag-isip higit anim na linggo

Sapagkat Year of the Rooster pa naman tayo,

Kung this year TILA OK… next year kaya’y ano?

Salamat naman kung TILA OK na-gets n’yo,

Well, wala ba kayong mga kamay? I thank you,

At alam kong hinihintay n’yong sabihin ko

Sa Taon ng Aso ang maswerteng trabaho!

Eh di sige’t pinipilit n’yo rin lang ako,

Eto nama’y kung seryong tanggap n’yo ‘kong HENYO,

Well, may kaugnayan sa transportation ito —

For the Year of the Dog… mag-BARKER ng jeep kayo!

O, ‘wag kayong magalit at malamang nito,

He, he, he… ay napatawa ko naman kayo!

TAWA! ‘Yan ang mahalagang isalubong n’yo

Sa taong DALAWANG LIBO at LABING-WALO!

‘Di lang tawa kundi L.O.L. gawin ninyo!

Swak na swak ‘yan sa darating na taong bago!

LOL lang nang LOL sa Year of the Dog lahat tayo,

Kaya labas nating lahat… ASONG LOL! Awooo!