Alcano nasango ni Ouano
CEBU, Philippines - Miiskor og dakung kadaugan ang Sugbuanong bilyarista nga si Genesis Ouano dihang iyang gipukan si kanhi World Pool champion Ronnie ‘The Volcano’ Alcano, 7-5 aron masakmit ang luna sa Top 16 sa Sinulog Cebu City Mayor’s Cup Open 10-Ball billiards tournament diha sa Jancor Billiards Hall sa dan Manalili, ning dakbayan.
Gawas kang Ouano, ang seguradong moabante sa Top 16 mao silang Nelio Tanio, Richard ‘Bong Bata’ Alinsub ug ang Sugbuanong champion nga si Anthony ‘Anton’ Raga.
Hinuon, nakabawi ra sab hinuon si Alcano sa second round kagahapon human siya midaog batok ni Lauro Bangay, 7-5.
Unang midaog si Alcano batok kang Ruben Meyot Cuna gikan sa Tagum City sa iskor, 7-4 sa pagbukas sa lima ka adlaw nga torneyo nga gibuksan ni Cebu City Mayor Michael L. Rama sa miaging gabii.
Mitambong sab sa opening ug sa ceremonial break si Lorenzo ‘Chao’ Sy, ang promoter sa maong torneyo.
Si Alcano kinsa lumad sa Calamba City, Laguna, maoy 2008 World Pool double champion sa 8-ball ug 9-all tournament didto sa United Arab Emirates. Nadaog niya ang singko milyones pesos.
Sa laing sangka, midaog si Nelio Tano sa Toledo City batok kang Asis ‘Adobo’ Tadique sa Binan, Laguna sa iskor nga 7-5 ug midaog sab si Jimmy Genesis Ouano sa Mandaue City batok kang Arnel Bautista sa Barobo, Surigao del Sur.
Adunay 19 ka mga banggiitang bilyarista sa nagkalain-laing dapit sa nasud ang misalmot sa maong torneyo nga matapos karong Sabado. .
Ang makampyon sa maong torneyo makadawat og P50,000. (BANAT NEWS)
- Latest
