Pagpalabi sa mga kahoy
Usa sa labing dakong pagmahay sa lokal nga kadagkoan sa Department of Public Works and Highways (DPWH) mao nga samtang sila ang gihan-okan sa tanang tulisok sa pagkaputol sa upat ka higanteng punoan sa Acacia sa Tinaan, Naga City sa niaging semana way bisan usa nga nagtagad pagpasidungog, o bisan pagpasalamat na lang, sa ilang pagluwas sa 142 ka punoan sa kahoy tungod sa pag-usab nila sa desinyo sa pagpalapad sa nasudnong highway sa Naga.
Nitataw si Regional Director Ador Canlas sa DPWH 7 nga hagbay rang nahuman ang ilang proyekto sa Naga. Busa wa na gyod unta kinahanglana nga mamutol pa sila og bisan unsang kahoy.
* * *
Apan ang Department of Environment and Natural Resources (DENR) niila og pito ka punoan sa Acacia nga gabok ug katumbahon na busa kinahanglang putlon sa labing daling panahon. Bisan napupos na ug wa magtagad ang DPWH pagpangayo og lugway sa ilang permiso sa pagpamutol sa mga kahoy, ang DENR maoy nilab-as sa permiso ug nitahas sa DPWH pagpangu sa pagpamutol sa mga kahoy.
Kini tungod kay ang DPWH may mga kawani ug kahimanan pagtuman sa tahas. Maong bisan sa presensiya sa mga kawani sa DENR, Kapitolyo sa Sugbo ug Naga City Hall, ang kadagkoan sa DPWH maoy gipauwanan sa tanang pangutana ug nanghilam-os sa tanang pagsaway.
* * *
Human gisuspenso ni Environment Secretary Ramon Paje ang tanang permiso sa pagpamutol sa kahoy alang sa pagpalapad sa kadalanan di lang sa Sugbo kun dili sa tibuok nang nasud, maghudyaka ang tanang nagpakabana pagpanalipod sa kinaiyahan sa hukom sa DPWH nga:
Di na manginlabot sa umaabot nga mga pagpamutol sa ubang punoan sa kahoy sa Sugbo ug ubang bahin sa nasud; ug
Di na mangayo og permiso sa DENR pagpamutol sa mga kahoy nga maigo sa pagpalapad sa kadalanan, mo-diretso na lang sila sa pag-usab sa desinyo aron wa nay bisan usa ka punoan nga maapektahan.
* * *
Nipasalig si Canlas nga wa sila mangluod. Igo lang nisunod ni Highway Secretary Rogelio Singson nga di na makig-away sa ubang buhatan sa gobyerno ug pribadong mga kompaniya ug indibiduwal, mangita na lang og paagi pagpatuman sa mga proyekto sa labing dali, hapsay ug makiangayong paagi. Mga implikasyon sa baruganan sa DPWH sa labing kontrobersiyal nga mga proyekto sa Sugbo:
Di na ibalhin ang nahibiling mga kahoy sa Serging Osmeña Road sa North Reclamation Area sa Cebu City, himoan og mga kahon samtang sementuhon ang tanang bakanteng luna;
Di na palapdan ang nasudnong highway gikan sa San Fernando paingon sa Carcar City aron nga di matandog ang mga Acacia; ug
Di na moapil pagpamutol sa mga nahibilin sa 88 ka kahoy nga giila sa DENR nga putlununon.
- Latest
