Ruffa ug Dawn dili apektado sa intriga

Hugot nga gihimakak ni Ruffa Gutierrez nga gitabangan nila ni Gretchen Barreto si Dawn Zulueta atol sa party sa Yes magazine anniversary sa milabay nga semana. Ang intriga mao nga sama ni Gretchen wala pod motagad si Ruffa ni Dawn.

Kahinumduman nga hagbay ra nga walay maayong buot sila si Gretchen ug Dawn sa usag-usa, human mibuto ang "primadonna" isyu ni La Greta atol sa pictorial alang sa usa ka magazine ug sa shooting sa usa ka shampoo commercial sa milabay nga tuig. Si Dawn maoy gitumbok nga tinubdan sa maong intriga.

Matud ni Ruffa nga dili tinood nga wala niya tagda si Dawn atol sa party tungod kay maayo ang relasyon nilang duha ug wala siyay gidapigan tali sa iyang mga amiga nga nag-away. Matud niya nga paglabay niya sa dapit nga nahimutangan ni Dawn, wala siya makakita sa aktres, hayan kinahanglan na niya nga magpa laser og balik sa iyang mata, kay sa nasayran 13-years old pa lang siya dihang dili na siya makaklaro.

Miingon si Ruffa nga human niya og dawat sa iyang award miduol pa man gani siya sa lamesa nga nahimutangan ni Dawn ug nagkinumustahay sila. Pag-uli niya iyang gi-text si Dawn nga nagniwang na ang naulahi ug samot na nga nindot kini tan-awon.

Matud pa sa host sa Philippines Next Top Model, nga mitubag si Dawn niya nga wala silay problemang duha ug nga super gwapa ug makabibihag gihapon siyang tan-awon. Tungod niini, iyang giagni si Dawn nga tabangan siya sa second celebrity bazar nga iyang mugnaon ug positibo ang tubag ni Dawn.