Magis Eagles 9-0 na

CEBU, Philippines — Ang reigning five-peat champions nga Sacred Heart School-Ateneo de Cebu (SHS-AdC) Magis Eagles mikulata sa PAREF Springdale Titans, 79-39, aron inaton ang perpekto nilang rekord ngadto sa 9-0 sa juniors division sa Cebu Schools Athletic Foundation, Inc. (CESAFI) Season 26 basketball tournament niadtong Domingo, Nobyembre 15, sa Cebu Coliseum.
Si Kiel Torres mibulsa og 13 puntos, unom ka rebounds ug usa ka block, samtang si Lian Kent Basa mitali sab og 13 puntos uban angupat ka rebounds, tulo ka assists ug usa ka steal alang sa Magis Eagles nga mao na lang ang way pilding koponan sa liga ning season. Sila si Hionrey Recio ug Sean Kedric Go mikadlit og 11 puntos matag usa, samtang si Gabriel Gonzales midugang og 10 puntos ug unom ka rebounds alang sa dominanteng Magis Eagles, nga sa usa ka higayon milabaw og 42 puntos.
Sa laing mga duwa sa high school, si Kirbey Borbon miposte og double-double nga 13 puntos ug 11 ka rebounds uban ang tulo ka assists ug duha ka steals, samtang si Jancy Llyco Ventura mihipos og 11 puntos, duha ka rebounds ug duha ka assists sa dihang giinat sa University of the Visayas (UV) Baby Lancers ang ilang baraha ngadto sa 6-4 uban ang 73-63 nga pagpakaging sa University of San Jose-Recoletos (USJ-R) Jaguar Cubs.
Si Alfredo Zafra mipupo og 23 puntos, upat ka rebounds, lima ka assists ug walo ka steals, samtang si Lance Luther Aballe mikolekta og 22 puntos, lima ka rebounds, tulo ka assists ug tulo ka steals aron pangulohan ang San Carlos School of Cebu (SCSC) Baby Warriors ngadto sa 101-69 nga paglampaso sa San Roque College de Cebu (SRCDC) Greyhounds alang sa ikatulo pa lamang nilang daog sa 11 ka duwa.
Sa collegiate division, Alcher John Pabalan mibubo og 18 puntos, pito ka rebounds, duha ka assists ug tulo ka steals aron ibandera ang Benedicto College (BC) Cheetahs ngadto sa 72-60 nga pagpayaka sa University of Southern Philippines Foundation (USPF) Panthers.
Sila si Den Rick Orgong, Jhunrel Dagatan ug JNunil Bulan nagkumboya'g 35 puntos alang sa Cheetahs, nga mipahugot sa ilang pagkupot sa liderato bitbit ang 10-2 rekord.
Si Christian Carl Sollano mikulit og 14 puntos, walo ka rebounds, upat ka assists ug tulo ka steals samtang sila si Jehu Syx Romanos, El John Lacaya ug Artemmy Chancy Illustrisimo nagkumbinar og 31 puntos sa gihang gibuntog sa USJ-R Jaguars ang University of Cebu (UC) Webmasters, 71-55, aron palig-onon ang ilang kampanya sa Final Four uban ang 7-6 nga marka.
- Latest
















