DILG: Cotabato shooter lulong sa ‘deep dark web’
MANILA, Philippines — Nalulong umano sa “deep dark web” ang 16-anyos na estudyante na namaril sa Banga National High School sa South Cotabato nitong Biyernes.
“Upon investigation, he was heavily into the deep dark web… According to his phone, he left several notes detailing his depression… discovered last April 2026 ng parents niya. And the parents tried to handle the situation ngunit nagkulang,” pahayag ni DILG Sec. Jonvic Remulla.
Batay sa imbestigasyon ng Banga Municipal Police Station (MPS) lumabas na miyembro ang suspek ng grupong True Crime Community o “deep dark web” na nag-impluwensya sa kanya na magplano ng pamamaril simula pa noong Agosto.
Ayon sa mga kaibigan ng suspek, nagbabala pa ito sa group chat na umalis sa eskuwelahan kung ayaw madamay, dahil itutuloy na niya ang pamamaril sa Setyembre 18.
Sa salaysay ng mga kaibigan, dapat noong Setyembre 3 pa isinagawa ang pamamaril ngunit naantala dahil wala pang armas ang suspek. Setyembre 18, dakong 1:15 ng hapon, natuloy ang pamamaril na ikinasawi ng tatlo at ikinasugat ng walo.
Hindi umano nagsumbong sa guro ang mga kaibigan ng suspek dahil inakala nilang biro lamang ang mga pahayag nito.
“Hindi lang ito national concern kundi international concern na, dahil mayroon silang social media platform na ginagamit na “True Crime Community”. Nagkakaroon ng indoctrination at binibigyan ng task na community o school shooting,” pahayag naman ni South Cotabato Gov. Reynaldo Tamayo.
Patuloy ang imbestigasyon ng mga awtoridad, kabilang ang posibleng pananagutan ng ama ng suspek na opisyal ng Disaster Mitigation Team ng DepEd, na nagmamay-ari ng baril na ginamit sa insidente.
Nagbabala din si Remulla sa mga magulang na bantayan ang mga website at social media na binubuksan ng kanilang mga anak.
“Tingnan ninyo. It is not a privacy issue. Anak n’yo ‘yan… Nalulublob sila sa malalalim at madidilim na websites,” aniya. “Tignan niyo po ang sine-search nila… Depression among kids is real. We must give access to proper psychiatric health care.”
Dagdag pa ng kalihim, makikipagpulong siya sa Department of Information and Communications Technology (DICT) at hihikayatin ang Kongreso na magpatupad ng mas mahigpit na regulasyon sa paggamit ng social media ng mga bata, gaya ng ginawa sa Australia.
Binanggit din ni Remulla na sa ilang nakaraang pagpupulong kasama ang mga game developers, lumabas na may mga bata na nakikipag-usap sa ibang platform habang naglalaro ng online games.
- Latest
