UAAP Season 89 opening pasasayahin ni Vice Ganda

MANILA, Philippines —  Tampok si Vice Ganda sa opening ceremony ng University Athletic Association of the Philippines (UAAP) Season 89 men’s basketball tournament na gaganapin sa SM Mall of Asia Arena sa Pasay City ngayong araw.

Handa na ang host Far Eastern University at para kay Athletic Director Mark Molina at UAAP Season 89 president, hindi sila magpapaiwan sa maganda at magarbong opening cere-mony na inorganisa ng host University of Santo Tomas nakaraang taon.

“We were pressured by UST last year,” sabi ni Molina. “You know what UST did last year? You guys put on a fantastic event, award-winning, credit to Father Rodel (Cansancio) and the entire UST community but FEU won’t be outshined,”

Maliban sa actor-comedian, hinugot din ng FEU si Filipino rapper, singer, at songwriter Gloc 9 para mas pasayahin at pabonggahin ang inihandang pakulo sa opening.

Ang dalawang OPM icons na sina Ganda at Gloc 9 ay mga prominenteng alumni sa FEU, sila ang magpapasaya sa mga fans at walong teams na lalaro at paparada sa nasabing collegiate league.

Magsisimula ang programa sa alas-5 ng hapon.

“We will have a great show on Saturday at MOA Arena. The athletes who are going to parade, they’re going to have a lot of fun. That’s going to be for sure,” ani Molina.

Inaasahang mapapansin din ang pagparada ng Ateneo de Manila University kung saan may itim na nakakabit sa kanilang uniporme bilang pagdadalamhati sa pagkamatay ng kanilang teammates na sina Divine Adili at Rene Baterbonia.

Nalunod sina Adili at Baterbonia sa dagat sa team-building trip nila noong Hunyo.

Bukas naman ang simula ng aksyon na lalaruin sa Araneta Coliseum kung saan ay masisilayan agad ang FEU na makakalaban ang Adamson University sa alas-12 ng tanghali, sunod ang defending champion De La Salle University kontra National University sa alas-2:30 ng hapon.

Sa alas-6 ng gabi naman ang bakbakan sa pagitan ng UST at last year’s runner up University of the Philippines.