Comelec target maabot 3 milyong botante sa Setyembre 30
MANILA, Philippines — Kumpiyansa ang Commission on Elections (Comelec) na maaabot at maaaring malampasan pa nila ang 3 milyong botante na target nilang mairehistro para sa 2025 National and Local Elections (NLE).
Sa datos na inilabas ng Comelec, hanggang nitong Abril 26, 2024 pa lamang o limang buwan pa bago ang deadline ng voter registration sa Setyembre 30, ay nakapagtala na sila ng 2,397,555 na aplikante sa isinasagawang voter registration.
Ito ay kulang na lamang ng 602,445 aplikasyon upang makumpleto ang tatlong milyong target.
Pinakamaraming nagpatala sa Region IV-A o Calabarzon na may 439,842 registrants.
Sumunod dito ang National Capital Region (NCR), 357,801; Region 3 (Central Luzon), 276,199; Region VII (Central Visayas), 171,942; at Region XI (Davao Region), 130,632.
Sinimulan ang voter registration sa bansa noong Pebrero 12 para sa May 2025 midterm polls.
- Latest
