Pangulong Marcos kay Duterte: ‘Secret deal’ sa China, ipaliwanag

MANILA, Philippines — Hinikayat ni Pangulong Ferdinand “Bongbong” Marcos Jr. si dating pangulong Rodrigo Duterte na ipaliwanag sa mga Filipino ang “secret deal” na pinasok ng kanyang administrasyon sa China kung saan dapat silang papanagutin dahil sa kanilang desisyon.

Ginawa ni Pangulong Marcos ang pahayag matapos kumpirmahin ng China embassy dito sa Maynila na pumayag si Duterte na i-regulate ang aktibidad ng Pilipinas sa West Philippine Sea (WPS).

Giit pa ng Presidente, hindi niya maintindihan kung bakit walang nakasulat sa papel o video at hindi sinasabi sa kanila na mayroong usapang gayung abogado naman si Duterte.

Naniniwala ang Pangulo na sekreto ang naturang agreement sa pagitan ng administrasyong Duterte at  China dahil hindi ito naisulat at sinikreto sa mga Filipino.

“I disagree with that idea that you enter into a secret agreement. You have any agreement with another sovereign state should really be known by the people so that way you’re accountable. If it’s a bad decision, you’re accountable,” saad pa ng Pangulo.

Naniniwala rin ang Pangulo na dapat malaman ng mga Filipino kung ano ang sekretong patagong usapan sa China ng Duterte administration at kung ano ang kanilang kinompromiso at pinamigay na teritoryo.

“With the confirmation of the Chinese Embassy, we now know that there is a secret agreement,” sabi ni Marcos Jr.

“Mayroon talaga silang secret na patagong usapan. Malinaw sa akin na may usapan sila na tinago sa taong bayan,” wika ng Pangulo. “We need to know what did you agree to? What did you compromise? Ano ‘yung pinamigay ninyo?”

Nauna nang inamin ni Duterte na nagkaroon sila ng kasunduan ni Chinese Presidente Xi Jingping na magkaroon ng status quo sa West Philippine Sea  o ang hindi pagdadala ng construction materials para sa repair ng BRP Sierra Madre sa Ayungin Shoal.