Kampo ni De Lima balak rumesbak

MANILA, Philippines — Planong buweltahan ng kampo ni dating Senador Leila de Lima ang mga taong nag-akusa sa kanya at nagdawit sa kanya sa illegal na droga sa New Bilibid Prison (NBP).

Sinabi ni Atty. Dino de Leon, na pinag-usapan na nila ng kanyang team ang tamang hakbang para sa pagtutuos sa kanilang “political prosecutors”.

Giit pa ni De Leon, hindi maaaring walang managot laluna sa mga ‘bumaboy’ sa justice system ng bansa.

Ayon pa sa abogado, ang mga taong nasa likod ng frame-up at sangkot sa politial persecution sa dating senador ay dapat managot dahil sa pagkakabilanggo ni De Lima sa loob ng mahigit anim na taon.

Samantala, umaasa naman si De Lima para sa pagkikita ng kanyang pamilya sa kanilang lalawigan at muling maibalik ang normal na buhay sa lalong mada­ling panahon matapos na makapag-bail at makalabas ng bilangguan nitong Lunes.

Nagtungo rin ang dating senador sa Minor Basilica sa Our Lady of the Rosary sa Manaoag, Pangasinan kahapon at inamin na wala pa siyang tulog matapos makalabas sa Camp Crame dahil sa matinding pagod.

Subalit ang mahalaga umano ngayon ay kasama na niya ang kanyang mga kaibigan at sa mga susunod na araw ay makakasama na ang kanyang pamilya at muling makakabalik sa kanyang normal na buhay.