Noche buena meat products may taas presyo - DTI
MANILA, Philippines — Asahan na ng mga mamimili ang pagtaas sa noche Buena meat products dahil sa 15%-20% na itinaas sa production cost ng meat processors, ayon sa Department of Trade and Industry (DTI) nitong Lunes.
Ito’y matapos makipagpulong ang DTI sa mga meat processors bilang paghahanda na rin sa darating na holiday season.
Nilinaw ng DTI na ‘very minimal’ lang ang ipinatong na dagdag sa presyo ng meat products tulad ng iba’t-ibang klase ng hamon.
Ito aniya ay nasa hanggang 4% lang naman dahil hangarin din ng meat processors na maging masaya ang mga Pilipino na makapaghanda ng inaasam nila gaya ng hamon.
“Hindi lahat ng hamon ay tumaas based sa aming pag-monitor. Hindi naman. ‘Yun ang nakita namin, kinolekta namin yung manufacturers’ SRP, at hindi naman talaga lahat nagtaas,” paliwanag ni DTI Assistant Secretary Mary Jean Pacheco sa isang public briefing.
Payo ni Pacheco sa mamimili na alamin sa ilalabas nilang Noche Buena guide upang maikumpara ang mga presyo ng iba’t-ibang produkto para mapagplanuhan na ang bibilhin bago pa magtungo sa grocery o supermarket.
Isusunod naman ng DTI ang pakikipagpulong sa iba pang manufacturer ng Noche Buena items.
- Latest
