Pagkikilanlan ng 19 sa 49 military personnel na patay sa 'Sulu crash,' inilabas na
MANILA, Philippines — Positibo nang pinangalanan ng Armed Forces of the Philippines (AFP) ang pagkikilanlan ng halos 20 sa 49 nasawi sa pagbagsak ng sinasakyan nilang C-130 nitong Linggo.
Una nang naiulat na marami sa mga nasawi ay bagong graduate pa lang na sundalo, na naitalaga sana para pagtugis ng teroristang Abu Sayyaf sa Patikul, Sulu.
Kasama sa 19 natukoy na sina:
Philippine Air Force
- Major Emmanuel Makalintal
- Major Michael Vincent Benolerao
- First Lieutenant Joseph Hintay
- Technical Sergeant Mark Anthony Agana
- Technical Sergeant Donald Badoy
- Staff Sergeant Jan Neil Macapaz
- Staff Sergeant Michael Bulalaque
- Sergeant Jack Navarro
AFP Medical Corps
- Captain Higello Emeterio
AFP Nurse Corps
- First Lieutenant Sheena Alexandria Tato
Philippine Army
- Sergeant Butch Maestro
- Private First Class Christopher Rollon
- Private First Class Felixzalday Provido
- Private Raymar Carmona
- Private Vic Monera
- Private Mark Nash Lumanta
- Private Jomar Gabas
- Private Marcelino Alquisar
- Private Mel Mark Angana
Itinama naman ni AFP chief of staff Gen. Cirilito Sobejana ang mga unang balita na 50 ang kabuuang bilang ng casualties, na siyang nagmula raw sa double count.
Sinasabing isa ang July 4 crash sa "pinakamalagim" sa kasaysayan ng militar sa Pilipinas, bagay na nagngyari nang sumabog ang eroplano habang sinusubukang lumapag.
Marami ang halos 'di na makilala
Ayon pa kay Sobejana, sinisikap pa nilang makilala ang 30 pang ibang bangkay, na siyang nakalagak pa rin sa Lungsod ng Zamboanga sa ngayon.
"This is a very hard task since the cadavers were beyond recognition but we have experts supporting our efforts," ani Sobejana sa isang pahayag, Miyerkules.
"We are doing our best to expedite the identification and the ongoing investigation without compromising its credibility."
Ilan sa mga ginamit na pamamaraan sa identification ng mga bangkay ang DNA tests sa 49 nasawi.
Matatandaang na-rekober na mula sa lugar ng insidente ang black box ng naturang eroplano, na isa sa mga ginagamit para makatulong sa imbestigasyon tuwing may disgrasya.
'Lumilipad na kabaong' mula Amerika
Martes lang nang sabihin ng Kilusang Magbubukid ng Pilipinas (KMP) na pinaglumaang mga eroplano na ng Estados Unidos ang C-130 na involved sa naturang plane crash, bagay na ni-refurbish lang kaysa bumili ng bago.
"The used aircraft have been flying since 1988. The acquisition of the two refurbished aircraft reportedly cost P2.5-billion and was financed by the PH and US governments. A brand new C-130 reportedly cost around P37-billion," ayon sa KMP kahapon.
"[T]his military aircraft mishap warrants the termination of the $2.43 billion or P118-B Foreign Military Sale deal between the U.S. and the Philippines. U.S. defense firm Lockheed Martin Corporation, the makers of C-130 aircraft, will be the principal contractor for the potential sale."
Ika-23 ng Hunyo lang nang mag-crash din ang bagong-biling S-701 Blackhawk utility helicopter ng Pilipinas ilang milya mula sa Col. Rabina Airbase in Capas, Tarlac, na siyang pumatay sa anim na Air Force personnel. — James Relativo
- Latest
- Trending
