OFW na bibitayin sa Saudi humihingi ng tulong
MANILA, Philippines - Humingi ng tulong sa Department of Foreign Affairs ang isang Pinoy na nakapila sa death row sa Dammam para makakuha ng Royal pardon na ibinibigay ng Hari ng Saudi Arabia.
Ang death convict na si Dondon Lanuza na nakakulong ngayon sa Dammam Central Jail ay nanawagan sa pamamagitan ng Blas F. Ople Policy Center para makakuha ng tulong mula sa DFA at embahada ng Pilipinas upang makakuha ng Royal pardon mula sa Hari ng Saudi.
Ayon kay BFO Policy Center President Susan Ople na tumatakbo din senador sa 2010 election, 120 preso ang napalaya matapos na mabigyan ng Royal Pardon noong Disyembre 11, 2009 ni King Abdullah bin Abdul Aziz Al Saud.
Nadiskubre din ng BFO mula sa isang text message ng OFW na si Jess Pamintuan na hanggang ngayon ay nakakulong pa rin ito dahil sa kawalan ng ayuda mula sa embahada ng Pilipinas. Si Pamintuan ay una ng nasentensiyahan ng Saudi court na makulong ng siyam na buwan, kaya naman umapela si Ople kay Vice president Noli de Castro na personal na tumungo sa Saudi para makapagbigay ng angkop na tulong para sa mga nakapiit na OFWs para sa posibilidad na pagpapalaya sa mga OFWs dito. (Ellen Fernando)
- Latest
- Trending