Tapales misaad nga mas lig-on sa iyang pagbalik
![Tapales misaad nga mas lig-on sa iyang pagbalik](https://media.philstar.com/photos/2024/04/14/sp1_2024-04-14_22-43-59.jpg)
CEBU, Philippines — Nakat-on og leksiyon sa miagi niyang kapildihan, si two-division world champion Marlon Tapales misaad nga mobalik nga mas lig-on ug kusgan.
Magsugod kining bag-ong misyon ni Tapales sa dihang iyang sangkaon si Thai Nattapong Jankaew alang sa World Boxing Council (WBC) Asian Continental super bantamweight belt karong Mayo 10 didto sa Midas Hotel and Casino sa Pasay City.
Sa miagi niyang away, si Tapales napakyas human gipalukapa sa ika-10 nga hugna sa gikaintapang
Hapon nga "Monster nga si Naoya Inoue sa ilang super bantamweight undisputed title fight niadtong Disiembre 29 didto sa Japan.
Si Tapales nagpabiiing malaumon bisan paman sa mapait nga kapildihan nga iyang natilawan.
"Pasalamat ko og dako sa Ginoo nga bisan tuod og napilde ko sa last nakong duwa, wala rako natagaak kaayo sa world rankings. Pasalamat sab ko sa akong boss (JC Manangquil) nga gitagaan ko niya og dula dayon para makabalik na sab ko," dason pa sa garbo sa Maranding, Lanao del Norte.
Karon, si Tapales naglantaw sa unahan nga napuno sa kadasig uban ang tinguha nga mamahimong world champion og usab sa umaabot.
"Wa koy laing mapasalig kondili mobalik ko ibabaw sa ring nga mas lig-on," matup pa ni Tapales.
Si Tapales nagkupot og 37-4 rekord uban ang 19KOs, samtang si Nattapong, nga mo-away sa unang higayon gawas sa iyang nasud, nagtangag og 12-3 nga baraha uban ang 8KOs.
- Latest