Sa Paris Olympics: Mills, Ingles mangu sa Australian Boomers

CEBU, Philippines — Ang duha ka mga beteranong bitoon sa NBA nga sila si Patty Mills ug Joe Ingles maoy mangu sa Australian national team nga mokumbati sa Paris Olympics diin ang Boomers naglaraw nga palabwan ang nakubit nilang bronze medal sa miaging 2020 Tokyo Olympics didto sa Japan.

Si Mills sa Miami Heat ug Ingles sa Orlando Magic naglangkob sa 10 ka NBA players sa kasamtangang 22-man lineup sa Boomers nga putlon ngadto sa 12 na lang ka buok alang sa Olympics nga magsugod sa Hulyo. Wala maapil si Brooklyn Nets forward Ben Simmons gumikan kay aduna kini gihambin nga angol sa iyang likod. Ang Australia gipayaka sa sa dominanteng US team sa semifinals sa Tokyo Olympics tulo ka tuig na ang milabay apan gipakaging ang Slovenia aron pagpahiluna sa ikatulong dapit.

Gawas nilang Mills ug Ingles, duna pay 10 ka players sa team nga nagpabilin apil na ang mga kauban nila sa NBA nga sila si Dante Exum, Jock Landale ug Duop Reath.

Ang Australia nabutang sa Group A uban ang Canada, Spain ug Slovenia. Sa kalig-on sa ilang grupo, gitawag kini nga 'Group of Death'.