Mga bitoon sa PBA nagtabla didto sa Bacolod

CEBU, Philippines — Nagtabla ang Team Japeth ug Team Mark sa iskor nga 140-140 atol sa makalingaw nilang PBA All-Star Game niadtong Dominggo sa gabii didto sa University of St. La Salle Gym sa dakbayan sa Bacolod.

Luyo sa pagpanginit nilang Jamie Malonzo ug RR Pogoy, ang Team Japeth misutoy ngadto sa sayong 46-20 nga labaw.

Gipabutor pa sa Team Japeth ang ilang bentaha ngadto sa 31 puntos sa sayong bahin sa ikaduhang kuwarter.

Apan ang Team Mark mi-rally pinaagi sa pagmangtas ni CJ Perez nga mipatuasik og 28 puntos sa ikaduhang kuwarter hinungdan nga mipaduol sila ngadto na lang sa 11 puntos, 68-79, sa halftime.

Namintinar hinoon sa Team Japeth ang double-digit nilang labaw, 140-129, sa pinal nga 1:42 sa duwa. Apan sa kalit lang nanginit si Robert Bolick.

Human sa duha ka free throwes ni Barroca, si Bolick milansang og four-pointer sa katapusang 34 segundos. Si Bolick miposa og laing four-pointer nga iya pang gipalamanan og free throw aron pagtabla sa iskor sa nahibilin nga 18 segundos.

Duna pa untay tsansa nga modaog ang Team Japeth apan wala masud ang tira ni Calvin Oftana dayong kapupos sa oras.

Sila si Bolick ug Japeth Aguilar maoy gipasidunggan nga mga All-Star MVP. Si Bolick mikadlit og 10 sa iyang 13 puntos sa katapusang kuwarter, samtang si Aguilar mipupo og 21 puntos.