Celtics padayong nagmangtas

CEBU, Philippines — Si Jaylen Brown mipaulbo og 33 puntos sa dihang gilampaso sa nagharing Boston Celtics ang nagkagidlay nga Detroit Pistons, 129-102, alang sa ikawalo nilang sagunson nga daog sa NBA kagahapon didto sa Little Caesars Arena sa Detroit, Michigan.

Wala man tuod ang tulo ka mga sinaligan sa Celtics nga sila si Jayson Tatum, Al Horford ug Jrue Holiday apan wala kaayo sila makaproblema tungod sa pagpanginit ni Brown, nga mipasud of 13 sa 19 niya ka itsa.

Dako sab hinoon og natampo si Payton Pritchard nga mipupo og 20 puntos ingon man silang Derrick White ug Kristaps Porzingis nga mihipos og 19 puntos matag usa alang sa Celtics nga miinat sa labing nindot nga rekord ning NBA season ngadto sa 56-14.

Sa laing bahin, gilabyan na sab sa Oklahoma City Thunder ang defending champion Denver Nuggets sa liderato sa Western Conference human gipakaging ang Toronto Raptors, 123-103.

Si Shai Gilgeous-Alexander maoy nangu sa Thunder uban ang 23 puntos, pito ka rebounds ug walo ka assists samtang si rookie center Chet Holmgren miamot og 18 puntos ug 10 ka rebounds.

Didto sa Los Angeles, ang Lakers migamit sa hugot nilang depensa sa second half aron paludhon ang Philadelphia 76ers, 101-94.

Si Anthony Davis mikolekta og 23 puntos ug 19 ka rebounds samtang si LeBron James mirapido og 11 sa iyang 20 puntos sa katapusang kuwarter.

Didto sa San Francisco, si Tyrese Haliburton mitimbre og 26 puntos ug 11 ka assists sa dihang gipayaka sa Inadiana Pacers ang Golden State Warriors, 123-111.

Si Pascal Siakam miamot og 26 puntos ug 16 ka rebounds alang sa Pacers.

Sa laing bahin, ang San Antonio Spurs nahagba sa mga kamot sa Memphis Grizzlies, 99-97, bisan pa man sa impresibong salida ni rookie superstar Victor Wembanyama nga miharos og 31 puntos, 16 ka rebounds, lima ka assists, duha ka steals, ug tulo ka blocks.