Kumbati na sa EASL Final 4

CEBU, Philippines — Ang giatngan nga Final 4 sa East Asia Super League (EASL) Final Four kumbatihan na karong adlawa didto sa Hoops Dome sa dakbayan sa Lapu-Lapu.

Sa pasiunang duwa sa alas-5 sa hapon, mag-abot ang duha ka mga Koreanong koponan nga Anyang Jung Kwan Jang Red Boosters ug Seoul SK Knights.

Ang Anyang moparada sa pambato sa mga Pinoy nga si Renz Abando nga bag-ohay pang nakabalik og duwa human nakahiagum og makuyaw nga injury tulo ka bulan na ang milabay.

Wala pa hinooy klaro kon makaduwa ba karon si Abando gumikan kay aduna na sab kini gihambin sa iyang panglawas human nahagba na sab sa pagtaak niya og balik sa korte niadtong Dominggo.

Sa main game, ang way pildeng Chiba Jets sa Japan B. League masakbang sa New Taipei Kings nga gipangulohan ni kanhi NBA star Jeremy Lin sa alas-8 sa gabii.