One Central Eagles Region XVI chessfest kasado na

CEBU, Philippines — Andam na ang tanan alang sa One Central Eagles Region XVI Annual Chess Tournament karong Sabado, Marso 2, didto sa Robinsons Galleria Cebu.

Luyo sa inisyatiba ni CPA-lawyer Rheneir Mora, ang usa ka adlaw nga pinug-anay sa utok giorganisa sa Fraternal Order of Eagles Philippine Eagles (TFOE-PE) Central Visayas Region 16 inabagan sa Integrated Bar of the Philippines (IBP)-Cebu Chapter ug Philippine Institute of Certified Public Accountants (PICPA) Cebu Chapter.

Si National Arbiter Kevin Yap sa Cebu School of Chess nagkanayon nga kapin sa usa ka gatos ka mga partisipante ang ilang gipaabot ning siyam ka hugna nga kompetisyon nga nagtanyag og dul-an sa P30,000 nga ganti alang sa mga mananaog.

Ang makampiyon mobulsa og P5,000, samtang ang mopahiluna sa ikaduha ngadto sa ikalimang dapit makadawat og P3,000, P2,000, P1,000, ug P700.

Ang 6th ngadto sa 10th mokubra og P500 matag usa, samtang ang makasud sa top 15 adunay konsolasyon nga P300.

Gawas sa medalya, adunay P500, P300 ug P200 nga insentiubo alang sa top 3 sa mga Eagles, laywers, ug CPAs.

Samtang ang top 2 sa ladies, seniors A ug B, ug Under 8, 12, 16, ug 20 players adunay mokuha nga P500 ug P300.

Ang rehistrasyon nagkantidad og P300 sa regular players ug discounted rate nga P200 sa mga senior citizens, PWDs, ladies, ug kids nga nag-edad og 12 anyos paubos.

Alang sa dugang detalye, kadtong mga interesado mahimong mokontak ni Atty. Mora (09176225655), NA Kevin Yap (09458559800 o bisitaha ang Cebu School of Chess Facebook page.