'Araw ng sibugay' basketball Alicia-KSB Glass miposte'g duha ka sagunson nga daog

CEBU, Philippines — Ang eksplosibong guwardiya nga si Mac Tallo mikuha og atensiyon sa dihang ang defending champion Alicia-KSB Glass mikadlit og duha ka sagunson nga daog aron pahayagan ang ilang kampanya nga madepensaan ang ilang trono sa 2nd Gov. Ann K. Hofer-23rd Araw ng Sibugay Invitational Basketball Tournament didto sa Provincial Capitol Culture and Arts Center sa Ipil, Zamboanga Sibugay.

Si Tallo mitagak og 22 puntos aron pangulohan ang Alicia/KSB ni coach Chelito "Chakang" Caro ngadto sa 105-85 nga paglampaso sa University of the Visayas (UV) Green Lancers niadtong Biyernes sa gabii alang sa una nilang daog ning lima ka adlaw nga torneyo nga nagdalit og P700,000 sa makampiyon.

10 ka oras pa lamang ang milabay, si Tallo ug ang iyang mga kauban mibalik sa korte alang sa laing sangka kagahapon sa buntag.

Bisan sa mubo kaayong pahuway, way pagbahar ang abilidad ni Tallo.

Mas bagsik pa gani ang giwadwad niyang duwa human si Tallo milansang og walo ka 3-pointers sa iyang 26 puntos sa dihang gibugha sa Alicia-KSB ang Titay RLT Valenzuela, 78-70.   

Uban ang 2-1 rekord, ang Alicia-KSB nanginahanglan og usa na lang ka daog aron birahon ang ikaduha ug katapusang luna sa final.

Makab-ot kini sa Glass Masters kon ilang mapilde ang UAAP champion La Salle Green Archers sa katapusan nilang duwa sa eliminasyon.

Sa laing bahin, ang National University (NU) Bulldogs milampornas sa UV Lancers, 98-78, aron pag-abante sa kampiyonato bitbit ang perpektong 4-0 nga baraha.