UV Lancers mibihag sa La Salle Green Archers

Kampiyon sa CESAFI gipakuratan ang hari sa UAAP

CEBU, Philippines — Ang ARQ-University of the Visayas (UV) Green Lancers mikolapso human nakalabaw og 17 puntos sa ikatulong kuwarter apan nadasigon nga namawi sa naghinapos nga bahin sa kulbahinam nga aksiyon aron pakuratan ang UAAP champion La Salle Green Archers, 83-79, sa 2nd Gov. Ann K. Hofer-23rd Araw ng Sibugay Invitational Basketball Tournamentniadtong Huybes sa gabii didto sa Capitol Sports Complex sa Zamboanga Sibugay.

"It's an overwhelming feeling beating the UAAP champ and crowd-favorite La Salle. It's a rare chance honestly," matud pa ni  Gary Cortes, nga migiya sa Lancers ngadto sa lima ka korona sa Cebu Schools Athletic Foundation, Inc. (CESAFI) sud sa pito ka sagunson nilang pagtaak sa finals sukad siya nahimong head coach sa UV niadtong 2015.

"The players just followed our game plan and are much hungrier for the win. Morale-booster na pud ni para sa team ug sa mga players nga pwede gyud diay ta modaug bisa'g underdog and undersized," dugang pa ni Cortes.

Human sa sikit nga kumbati sa sinugdanan, ang Lancers kalit nga nagmangtas aron pagposte og dakong 61-44 nga labaw sa nahibilin nga 3:50 sa ikatulong kuwarter.

Ang La Salle, nga usa gihapon ka lig-ong puwersa bisan og wala ang alas nilang si Kevin Quiambao, milusad og mainit nga resbak aron pagsikit nila ngadto sa usa na lang ka lugas, 73-74, sa katapusang kuwatro minutos.

Apan ang mga Visayanians mipakita og igong katakos pinaagi nilang Zylle Cabellon ug Ted Saga nga mibomba og duha ka sagunson nga tres nga nakapahinhawa og lawom sa Lancers uban ang 80-73 nga bentaha sa pinal nga 1:54 nga marka.

Ang Green Archers mihulga sa katapusang higayon, 77-80, sa nahibilin nga 37 segundos apan si Cabellon misalbar sa Lancers pinaagi sa pagpasud sa krusyal niyang mga free throws nga nagtuldok sa makutas nilang kuwatro puntos nga kadaogan.

Si Cabellon maoy nangu sa Lancers uban ang 20 puntos, tulo ka steals ug usa ka assist.

"Gusto modaog ang tanang teams nga niapil aning ligaha. Siyempre mas nangamdam lang mi kay dili basta-basta ang among makontra. Maong amo gyud gipaningkamotan nga modaog mi ug salamat sa Ginoo kay iya gidungog ang among pag-ampo," dason pa ni Cabellon.

"Tanan gipang-estorya ni coach (Cortes) amo gyud gipaminaw ug among gi-apply sa duwa maong nakab-ot namo ang kadaugan," padayon pa ni Cabellon.

Si 2023 CESAFI MVP Kent Ivo Salarda miamot og 11 puntos, si Raul Gentallan mi-iskor og 10, samtang sila si Jimpaul Amistoso, Jiesel Tarossa, ug Froiland Maglasang mitampo og otso puntos matag usa sa balanseng ataki sa Lancers.